Minimarket den Biminisweg unda e atrako a tuma lugá.

Willemstad— Polis mester a bai Wah Mei Minimarket den Mirla Plateweg den e bario di Buena Vista pa un kaso di ladronisia ku violensia.

Loke ku a hala basta atenshon ayera den oranan di atardi durante di e atrako ta ora ku a tuma nota ku un dama mester  tabata envolví den e atrako aki. For di e grabashon  por a mira kon dos tipo ta kore for di un distansha pa asina por a drenta e Minimarket. Tabata trata di un hòmber i un muhé kual tur dos  su kara tabata kubri ku un flanèl. E dama tabatin un tas den su man miéntras e hòmber un arma kual e la menasa e chines kuné. E hòmber a pasa tras di e tonbank i a ranka e kaha di plaka pa asina por a bai kuné pero esaki a keda pega na e waya di  koriente pone ku esaki a kita kai. E dama mester a haña chèns pa kue algun artíkulo for di riba e tonbank i a hinka esaki den un tas pa despues huntu nan sali kore bai. For di testigunan a bin komprondé ku e duo aki mester a drenta den un vehíkulo kolo blou kual un parti di dje mester tabata blanku. Mesora a kuminsá ku un búskeda den e aria i tabata den Biminisweg ku a bin topa ku un vehíkulo ku tabata kuadra ku e deskripshon pero bandoná. Mesora a laga konfiská e vehíkulo aki pa mas investigashon. Tambe den serkania di e vehíkulo a bin topa ku un revòlver di ko’i hunga kual tambe a keda konfiská. E kaso ta den investigashon.