Back to Top
Responsive image
E korant di pueblo

Na Seychelles: 30% di personanan bakuná a keda infektá pa Covid-19


May 15, 2021 • 3 minüt pa lesa

Porsentahe di populashon bakuná kontra Covid-19

VICTORIA- Ministerio di Salú di e islanan Seychelles a duna di konosé ku mas ku un terser di e personanan ku a tèst positivo pa Covid-19 ta personanan kompletamente bakuná. Organisashon Mundial di Salú (WHO) a anunsiá ku lo revisá dato aki.

Islanan Seychelles, ku ta keda den oséano Indio banda di Afrika oeste, ta kousando preokupashon mundial serka ekspertonan di salú despues ku un oumento di kasonan di Covid-19 a presentá serka personanan kompletamente bakuná.

E islanan Seychelles a kondusí un trayekto di bakunashon sumamente eksitoso te ku awor; Nan a logra di ta e pais ku mas tantu hende bakuná kontra Covid-19 na mundu, mas ku Israel i Reino Uní.

Mayoria di e personanan bakuná na Islanan Seychelles a risibí e bakuna Sinopharm di China, kual a ser aprobá pa uso di emergensia dor di WHO, djabièrnè 7 di mei, tambe tin personanan ku a risibí e bakuna di Covishield, kual ta un vershon di AstraZeneca produsí na India. En total, Seychelles ku un poblashon di 97.000 hende, a registrá alrededor di 8.200 kaso di Covid-19 i 28 morto durante e pandemia.

Resientemente, Ministerio di Salú na Seychelles a informá ku tin un oumento fuerte den e tasa di infekshon ku Covid-19. Fin di Aprel (dia 30), nan a registrá 120 kaso nobo, un siman despues (7 i 8 mei) ya tabata registrá un promedio di 300 kaso nobo pa dia.

Tasa diario di infekshon ku Covid-19

Di tur e kasonan positivo, 63% ta personanan ku no a bakuná òf ku a bakuná ku un shòt so. Esaki ta nifiká ku 37% di e infekshonnan nobo ta serka personanan ku a risibí ámbos shòt di bakuna.

Di personanan ku a keda hospitalisá, 80% no tabata bakuná i mayoria tabata personanan ku ta sufri di malesanan króniko kual ta hasi nan mas vulnerabel. Di personanan ku a keda interná den kuido intensivo kasi niun no tabata bakuná. Te dia di awe, ningun persona ku a keda bakuná no a fayesé pa motibu di infekshon ku Covid-19, esaki Ministerio di Salú ta añadí.

Ta konosí ku di e personanan kompletamente bakuná na Seychelles, 57% a risibí Sinopharm i 43% Covishield. No ta konosí kua bakuna e personanan ku a keda bakuná kompletu i a tèst positivo a keda suministrá kuné.

Sin duda, e oumento den kasonan di Covid aki a alarmá ekspertonan rònt mundu. Espesialmente komo ku 60% di e populashon di Seychelles ya ta kompletamente bakuná. Es mas, 86% di e esnan ku por a risibí bakuna a keda bakuná kompletamente.

WHO

Ekspertonan di Organisashon Mundial di Salú ta duna di konosé ku e situashon di Seychelles ta unu sumamente kompliká. Manera por mira for di resultadonan publiká ariba, e bakunanan ta efektivo den prevenshon di hospitalisashon i morto. Mayoria di e kasonan ku a okurí ta infekshonnan leve. Sinembargo, loke tambe ta importante ta ku un frakshon supstansial, mas ku 80%, di e populashon a keda bakuná. Lokual ku ya ta konosí ta ku algun di e kasonan a okurí djis despues ku a risibí e promé shòt, un par di dia despues di e di dos shòt i entre e promé i di dos shòt.

WHO su direktor di imunisashon I bakunashon, Dr. Kate O’Brien, ta bisa ku den e situashon spesífiko aki un evaluashon detayá mester wòrdu hasí. Promé mester averiguá ta kua vershon di e vírus di Covid-19 ta sirkulando na islanan di Seychelles, tambe mester wak na ki momentu e infekshon a tuma lugá serka esnan ku ta kompletamente bakuná i por último mester evaluá gravedat di e kasonan. Na momentu ku kaba di hasi un análisis di e situashon por evaluá si enbèrdat ta trata di un fayo den efektividat di e bakunanan òf si ta trata di un kambio den e tipo di infekshon.

Na e momentu nan aki e situashon ta bou di investigashon pa por duna informashon mas spesífiko tokante e situashon.

Efektividat di bakuna

Organisashon Mundial di Salú (WHO), a atvertí na vários okashon ku bakunashon so no lo ta sufisiente pa kaba ku e pandemia, pero ku esaki ta un arma mas, pa yuda kombatí e vírus di Covid-19.

Restrikshon di kontakto sosial i higiena personal, te ainda ta keda konsiderá e base pa prevení plamamentu di e vírus.

E situashon na Seychelles ta fungi komo un rekordatorio ku ningun bakuna aktualmente aprobá kontra coronavirus no tin un efektividat di 100% kontra infekshon ku e vírus. Tòg e bakunanan ku ta outorisá dor di WHO a demonstrá di ta sumamente efektivo den prevenshon di malesa severo kousá pa Covid-19, hospitalisashon i morto. Esaki por mira den resultadonan di paisnan ku ta avansá den nan trayekto di bakunashon manera Reino Uni, Israel i islanan di Seychelles mes.

Bakunanan di Covishield i Sinopharm
Login