Vehíkulo den kual e shofùr a bin pèrdè su bida.

Willemstad— Kòrsou a konosé un djabièrnè despues ku a kita lockdown i nèt algu despues ku Toke de keda a drenta na  vigor un kaso lamentabel ora ku un shofùr envolví den un aksidente a bin pèrdè su bida riba Kaminda Mitologia na St Joris.

Den oranan di anochi tantu Polis i tambe ambulans a keda dirigí pa Kaminda Mitologia na altura di White House snek pa un aksidente basta grave despues ku dos vehíkulo a dal frontal kontra di otro.  na e prome instante a pidi presensia di e tim di reskate pa asina por a saka shofùr di un di e vehíkulonan ku a keda pega den e outo. Pero mas despues esaki no tabata nesesario mas ora ku a logra di saka e dama shofùr for di e vehíkulo. Na e otro banda di kaminda tabatin un otro vehíkulo ku un hòmber tras di stür kual tabata den un estado di basta prekupashon. Personal di ambulans ku a presentá na e sitio mesora a bai trata di reanimá e shofùr den e vehíkulo pero esaki a resultá enbano. Mesora a pidi e demas outoridatnan na e sitio mirando ku ya e shofùr maskulino no tabata dunando señal di bida mas. For di investigashon preliminar realisá na e sitio a bin sali na kla ku e vehíkulo kolo shinishi manehá pa e hòmber ku a bin fayesé ku tabata kore riba Kaminda Mitologia den direkshon di Beurs miéntras e otro vehíkulo kolo Pretu  manehá pa e dama tabata koriendo den direkshon di Koraal Tabak. Dado momento un di e vehíkulo a hala riba man kontrali ku a pone ku a surgi un aksidente frontal. E choke tabata asina fuerte kual a pone ku e vehíkulo manehá pa e dama parti di e motor a sali kai for di e vehíkulo i esaki a keda basta destruí. Debí na e impakto sumamente fuerte aki e vehíkulo manehá pa e hòmber a lastra bai para kantu di kaminda. Debí na e choke aki e shofùr maskulino a bin fayesé al instante. Polis di tráfiko huntu ku Tim Forensiko a keda enkargá ku e investigashon. Famianan ku a tende di e aksidente a presentá na e sitio i tabata sumamente duru pa nan wak kon nan ser kerí tabata sin bida den e vehíkulo. Di parti di Vigilante nos ta ekstendé palabranan di kondolensia na famia di e defuntu ku pèrdida di nan ser kerí.