Back to Top
Vigilante banner image

Na yüni: Reunion públiko tokante ‘preferred bidder’ pa refineria i krímen durante negosiashon CPR


May 2, 2023 • 3 minüt pa lesa

WILLEMSTAD – Presidente di Parlamento Charetti America-Francisca a konvoká e debatenan ku gobièrnu tokante dos tema ku tin di aber ku refineria. Ta trata di e petishonnan di Parlamentarionan Giselle Mc William di MAN, Rennox Calmes di TPK, Quincy Girigorie di PAR i Michelangelo Martines di KEM pa debatí tokante e karta pa eskoho di ‘preferred bidder’ pa operashon di refineria.

 I tambe e petishon di frakshon di PAR pa un reunion públiko ku karakter di urgensia tokante e kontenido inkriminatorio di e rapòrtnan forénsiko relashoná ku negosiashonnan di Refineria di Kòrsou NV (RDK) i Curaçao Petroleum Curaçao (CPR).  E reunion ta planiá pa start 9’or di mainta riba 19 di yüni próksimo. Pa ámbos tópiko e Presidente a stipulá e tempu pa papia na 15 minüt den e promé tanda i 10 minüt den e segundo tanda. Parlamentario Mc William mester a manda un di dos karta p’e Presidente di Parlamento, rekòrdand’e riba un karta di oposishon di dia 23 di febrüari último ku e petishon pa e reunion públiko riba e karta pa eskoho di ‘preferred bidder’ pa opershon di refineria. E tabata ke pa yama e reunion pa kaba.

E Parlamentarionan a indiká den nan petishon di a tuma nota dje kontenido di e karta ku representante di Grupo GIK a manda pa Ministernan di gabinete Pisas 2. GIK ta un djesnan interesá den operá refineria Isla, ku a lansa akusashon fuerte kontra gobièrnu, tachando integridat dje proseso di eskoho pa un operadó di refineria. Pa e motibu akí nan ke un reunion urgente ku Minister di Asuntunan General (AZ) Gilmar Pisas.

Den e karta GIK ta akusá dos Minister di gabinete Pisas 2, ku probablemente a influensiá e proseso di tal forma ku no a skohe GIK komo e asina yamá ‘preffered bidder’. Segun e Parlamentarionan esaki sigur ta un akusashon fuerte kontra gobièrnu i ta tacha integridat di e proseso di eskoho pa un operadó di refineria. Pa e operashon di refineria ta di gran importansia eksigí profeshonalismo, integridat i sinseridat di parti gobièrnu.

Krímen
Ademas Parlamentarionan Quincy Girigorie, Steven Croes i Ana Maria Pauletta a pidi America-Francisca pa konvoká un reunion públiko ku karakter di urgensia pa haña splikashon konkreto di Minister Presidènt Gilmar “Pik” Pisas tokante dje kontenido inkriminatorio di e rapòrtnan forénsiko relashoná ku negosiashonnan di RDK i CPR.

Den nan petishon por eskrito e Parlamentarionan ta mustra bèk riba e echo ku durante e reunion públiko di 16 di yanüari último tokante e tema ‘desaroyonan di negosiashon pa apertura di refineria’, Minister Presidènt Pisas a trese dilanti ku e lo laga RDK pone algun dokumento relashoná tokante e reunion “ter inzage” di Parlamento. Esaki ku e Parlamentarionan ku ke por tira un bista den e dokumentonan, na un lokalidat i riba un fecha apuntá pa RDK. A pone e dokumentonan akí “ter inzage” di Parlamento entrante e siman di 20 di mart último, na ofisina di RDK.

Girigorie a hasi uso di su derecho di tuma nota dje dokumentonan. Despues ku mas ku ku 2 siman a pasa den kua tur miembro a haña oportunidat pa por tuma nota dje dokumentonan poné na disposishon di Parlamento, Girigorie a aserká Presidente ku e petishon. “Mirando ku no por a tuma nota dje dokumentonan durante di e reunion públiko, Parlamento no a haña e oportunidat pa debatí riba kontenido di e dokumentonan akí durante e reunion públiko, manera ta usual.”

E informashonnan ku Girigorie a tuma nota di dje i ku el a kompartí ku miembronan dje frakshon, ta di índole asina grave ku pa Girigorie mes, Croes i Pauletta ta altamente urgente i nesesario pa Parlamento kompleto deliberá ariba. Lo mester deliberá riba e konklushon ku por saka for di e dokumentonan akí, pero prinsipalmente e rapòrtnan relashoná ku e investigashon forénsiko di e dokumentonan falsifiká. “Deliberashon di Parlamento den su totalidat ta bira ainda mas urgente i nesesario, momentu ku tuma nota ku informashon ku gobièrnu a suministrá na Parlamento durante e reunionnan riba e tema akí (11 i 16 di yanüari 2023), NO ta kuadra ku kontenido di e rapòrtnan forénsiko na disposishon di Parlamento.”

Login