WILLEMSTAD,—-Nada pero nada nobo no a bin dilanti durante di e reunion ku a tuma lugá ayera na kantor di MEO. E personanan ku a bai e reunion a sali mes un fadá ku nan tabata promé ku nan a drenta e reunion.

T’asina ku normalmente e plan tabata pa minister presidente Gilmar Pisas, tambe lo ta presente durante di e reunion. Esei ta loke ku práktikamente tur e personanan ku ta representá e sektor farandulero a spera. Pero na nan yegada nan a mira ku minister presidente no tabata presente.

Asta algun di nan a kere ku e ta presentá un tiki mas lat, pero esaki a resultá di no ta e kaso. Esei tabata e promé desepshon ku e personanan a haña riba e dia di ayera.

Esnan ku si tabata presente di parti gobièrnu na e reunion aki, tabata señor Lesley Fer di ‘Krísis Tim’i Ronny Cornelis di MEO.

Vigilante Farándula a komprendé ku e reunion a laga un smak hopi amargo atras, serka esnan ku tabata presente, paso nada nobo no a bin dilanti. Tur kos a keda den mesun posishon ku esakinan tabata.

En kambio wikènt tras di lomba farándula a habri na Hulanda, anto zetá. Manera ku e kosnan ta mustrando aki i ku e reunion ku a tuma lugá ayera, e lus ta mustra mas pagá ku esaki ta mustra sendé.

Músikonan sigur mester kuminsá na pensa riba otro alternativanan. Paso mirando kon e kosnan ta aktualmente, sigur farándula lokal lo bai keda mará na 100 persona pa evento i esaki sigur no ta generá manera ku e músikonan a kustumá kuné.