Nieuwe Haven– Shete hòmber di nashonalidat venezolano, ayera a presentá dilanti korte penal. Ministerio Públiko ta akusá e hòmbernan di tabata trata na importá un kantidat di 1.300 kilo di mariwana mas 3 kilo di kokaina.

Pero ayera e hòmbernan ta kanta “foul play” di parti di Warda Kosta pasobra momento e botonan di Warda Kosta a yega nan tabata apénas 7 mia for di kosta venezolano. Segun nan deklarashon ayera, nan destino no tabata Kòrsou i na momento e fregata di Marina a interseptá nan lancha, ainda nan tabata mira e lusnan na kosta di Venezuela.

Ta trata di e hòmbernan, tur nase na Venezuela, Jose Pacheco, Adrian Delcine, Xavier Delcine, Javier Guillen Lopez, Jose Rodriquez, Neomal Cedeno, Wreyner i Urbina Sovil. Riba 24 di Yüni e fregata di warda kosta a nota e hòmbernan riba un lancha unda a interseptá nan nabegashon. Durante investigashon a bin resultá ku tabata trata di un nabegashon narkotráfiko, pero segun e venezolanonan nan no tabata den awanan internashonal sino ainda nabegando den laman venezolano, apenas 7 mia.

Tabata riba 24 di Yüni último e barku di Marina Zr.Ms. Groningen i Warda Kosta Karibe Hulandes a interseptá dos transporte di droga i a konfiská kasi 2.000 kilo di droga. Segun un komunikado di Warda Kosta, Zr.Ms.Groningen, tabata nabegando pa Warda Kosta Karibe Hulandes, durante mardugá di riba 24 di Yüni ku a interseptá e transporte di droga. A lansa dos boto rápido di intersepshon di e barku patruyero, e asina yamá FRISC, pa interseptá e go-fast nan. Una bes na un distansha serka, e FRISC huntu ku e tim di Wardakosta Karibe Hulandes, Skuadron di Infanteria di Flota (Fleet Marine Squadron) i e tripulashon di Zr.Ms. Groningen, a identifiká nan mes na e boto sospechoso, pa medio di sende nan lusnan ’zwaailicht’ blou. Despues di esaki e boto a purba hui ku un velosidat haltu i e tripulashon a kuminsá tira paketenan den laman. Durante e pèrsekushon a dispará tirunan di atvertensha i finalmente un di e motornan di e go-fast mester a keda desaktivá pamedio di tirunan dirigí. E shete sospechosonan na bordo di e go-fast finalmente a entregá nan mes. E tim di e FRISC a saka e paketenan ku a keda tirá den laman.

Korte a bolbe trata e kaso ayera, pero e biaha aki den su totalidat.