Rechasá: Nashon Uní ta rechasá e ponensia di Hulanda ku ta menasá ku sosten finansiero pa krea obstakulonan pa e paisnan hasi uso di nan outo determinashon. 

NEW YORK – Segun e komishon di Nashon Uní, siudadanonan den Karibe Hulandes ta wòrdu deskriminá pa motibu ku e kondishonnan stipulá pa sosten finansiero den Karibe Hulandes no ta igual na esnan den regionnan Hulandes Oropeo.

E komishon di Nashon Uní pa Eliminá Deskriminashon di Rasa a ekspresá nan preokupashon pa lokual ta trata e distinshon den Reino Hulandes na momentu ku ta trata sosten finansiero relashoná ku e pandemia Covid-19. Segun e informe, e komité a bin kompronde ku e sosten finansiero hulandes pa paisnan den Karibe hulandes tabata mará na kondishonnan menos faborabel ku e kondishonnan pa paisnan den region hulandes oropeo. Nashon Uní ta rechasá e ponensia di Hulanda ku ta menasá ku sosten finansiero pa krea obstakulonan pa e paisnan hasi uso di nan outo determinashon.  Tambe tin preokupashon ku Hulanda ta duna menos sosten pa aliviá e efekto negativo ku Covid-19 a trese riba e ekonomia entre e minoridatnan den e paisnan Karibe Hulandes. E komishon a tuma nota di informashon ku Lei Hulandes i gobièrnu na Hulanda ta distinguí hulandes nasé den Hulanda Oropeo i esnan ku a nasé den Karibe Hulandes.

Pa evitá deskriminashon entre hulandesnan nasé den Karibe, e komishon a duna algun rekomendashon. Un di e konsehonan ku e komishon a trese dilanti ta pa e Estado Hulandes garantisá outonomia pa e paisnan den Karibe Hulandes i pa inkluí partisipashon di e paisnan den tomo di desishon na momentu ku desishonnan tin efekto riba nan. Tambe e komishon ta pidi pa entamá un dialogo entre representantenan di e poblashon karibense ku a eksperensiá deskriminashon.