Back to Top
Vigilante banner image

Gyasi Ito ku Max ta gana kareda nashonal di ruta


June 29, 2021 • 1 minüt pa lesa

D.r.p.d. Max Janssen, Gyasi Sulvaran i Wilfried Camelia. E 2 últimonan ku futuro siklistanan.

WILLEMSTAD—Bou di ouspisio di Curaçao Cycling Federation, a tuma lugá e kompetensia di ‘Curaçao Cycling Championships’, durante di e fin di siman ku ta tras di lomba.

Tabata karedanan ku a kore riba djasabra i djadumingu último, den área di Mijnmaatschappij Curaçao i Santa Barbara, na altura di Tafelberg. E promé fecha a konta ku kompetensianan di tempu riba distansia di 21.3 kilometer. Miéntras ku e segundo fecha, a konta ku kareda riba distansia di 82 kilometer pa partisipantenan femenino I 117 kilometer pa koredónan maskulino.

Max Janssen ku tempu di 31 minüt i 38 sekònde tabata e ganadó di e promé fecha, lagando su tras Gyasi Sulvaran i Nigel Reid, unda ku Carine Jaensch, komo ganadó den kategoria femenino, tabatin tempu di 38.27 minüt, ku Piternel Albersen i Deborah van Grootveld, komo e otro dosnan den premio.

Pa loke ta e kategoria maskulino riba e di 2 dia di kompetensia, Gyasi Sulvaran a gana, siguí pa Max Janssen i Wilfried Camelia. Den kategoria femenino, unda biaha mas Carine Jaensch, tabata e ganadó.

Carine Jaensch, kende a dominá den kompetensianan entre siklistanan femenino.

Tabata un evento, despues ku pa motibu di Coronavírùs i e pandemia, unda aña pasá no tabatin ningun aktividat, ku tabatin kareda despues di alrededor di 1 aña i mei den siklismo riba nos isla. E federashon di siklismo lokal ta mira atras riba un eksitoso evento i ta gradisí pa Coca-Cola ku a sòru pa e siklistanan por a bebe Vitamin Water i tambe Mijnmaatschappij Curaçao i Santa Barbara, ku a hasi posibel, ku nan kompetensia por a tuma lugá.

Login