Skalo– Durante 2017, grupo Ennia Caribe Holding a hasi dos transakshon grandi ku por komprometé Banko Sentral su supervishon. Grupo Ansary a alegá den korte sivil durante komparashon di partidonan na 2020  ku, “nan a desvia fondonan na Ennia pa invertí riba bolsa estado unidense pero ku outorisashon di banko sentral”.

E fechanan di e transakshonnan ta un debilidat serio pa Ennia Caribe Holding i manehadó emergente CBCS, Banko Sentral. E agensia notisioso internashonal Reuters, den nan emishon di notisia riba bolsa di invershon na New York, a konfirmá ku Hushang Ansary a kumpra akshonnan mionario. Reuters, mesora a anunsiá e intenshon di Hushang Ansary pa trese kambio den su bolsa di invershon. Ta trata di dos interkambio konfirmá pa Reuters. 13 di sèptèmber 2017 Hushang Ansary a raportá un tomo pasivo di 8.8% den Kirby Corporation. Kirby tabata balorá na 5 bion dòler riba merkado di bolsa estado unidense. I riba 6 di novèmber 2017 Reuters ta anunsiá ku Ansary, un biaha mas ta raportá un tomo pasivo di 6.7% den Nabors Industries. Nabors ta balorá na 2.2 bion dòler.

Pa ámbos tomo pasivo por a tuma lugá, mester tabatin firma di tantu direktornan lokal di Ennia i di Banco di Caribe. Interesante tambe pa sa, ku tantu na sèptèmber 2017 komo na novèmber 2017, ken tabata enkargá ku e supervishon na Banko Sentral. Esaki pa determiná i òf konfirmá e motibunan dikon tabatin mester di firma na Kòrsou pa transakshonnan tuma lugá den kompanianan estado unidense. Pero ta indikativo ku e transakshonnan di atkishon i kompra di akshon riba bolsa estado unidense a wòrdu konkretisá na 2017.

Segun dokumentashon ofishal di e Komishon Estado unidense representantenan na Ennia Caribe Holding, EC Investments BV, Parman International BV,EC Investments International Sarl (Luxemburgo), Parman Capital Group LLC, Parman Enterprises LLC, Kirby Corporation (USA) a firma pa e transakshonan tuma lugá.  Den un di dos dokumentashon di kambio serka e grupo di invershon, mester a firma direktornan i representantenan di Parman, Ennia Caribe i tambe di Banco di Caribe huntu ku Banco di Caribe i Banco di Caribe Investments BV.