Willemstad,– Señora Dainadira Eustatius Martis a bisa ayera ku CBS ta presentá algun parti di e resultadonan di e empresa Forsa Laboral (AKO) i esaki ta nifiká ku lo bai tin mas resultado ku lo keda presentá den e dianan ku ta bini, pero komo ku tin hopi demanda pa e sifranan i hopi spekulashon, no kier a tarda pa sali ku a loke CBS a mira a base di e enkuesta kiko nan a hasi.

A hasi un enkuesta bou di en prinsipio 3000 kas di famia anto a hasi kada miembro di e  kas di famianan aki pregunta, pero komo ku tabatin di haber ku Covid-19, e biaha aki no por a bai personalmente na kas di e famia i a hasi e enkuesta telefónikamente.

Komo ku no tabata sa kiko lo tabata esaki su efekto kasnan di famia, a kuminsá ku e muestra inisial di 3000, pero na mes momentu ku a saka e muestra aki a saka mil kas di famia èkstra pa por si a kaso mester di mas kas di famia pues mas informashon pa por yega na e kantidat di informashon ku mester kual ta alrededor di 4000 pa 4500 persona.

Señora Dainadira Eustatius Martis a bisa ku manera a indiká kaba, e enkuesta a bai via telefon i a papia ku un pèrsona ku a kontesta pa tur e pèrsonanan ku ta biba den e kas di famia.

E parti di kolekshon di data a tuma lugá di 10 di òktober te ku 1 di novèmber.  Enkuesta di Forsa Laboral ta un sondeo bou di e kasnan di famia ku CBS ta tene tur aña den luna di sèptèmber/òktober for di 1987, pa midi e desaroyonan mas resien riba merkado laboral, manera e sifra di desempleo, e nivel di partisipashon, e kantidat di habitante ku tin trabou i e kantidat ku ta buskando trabou.

Den 2020 e merkado laboral a ser impaktá dor di COVID-19. Esaki sigur tabata tin desaroyo negativo riba e sifra di empleo. Ora wak sifranan di 2014 te ku 2020, por mira ku na 2020 e kantidat di persona ku ta empleá a baha severamente kompará ku e añanan anterior. Esaki ta entre otro pa motibu di e bahada den demanda riba merkado laboral dor di COVID-19. Mester bisa mesora ku e situashon por tabata pió paso segun datonan ku CBS a kolekta, 34% di personanan empleá a indiká ku nan no a pèrdè trabou pero si, pa un tempu largu/indefiní, a pèrdè ora di trabou, salario òf (parti di) benefisionan sekundario pa motibu di COVID-19 (52.6% a indiká ku nan no a pèrdè nada).