Falsu: foto fo’i pasport falsu di Franz ku un peluka na Portugal

Punda—Kuerpo di Polis, no tin informashon riba posibel presensha di un seri asesino (serial killer) aleman ku posiblemente ta òf tabata kedando na Kòrsou. Segun e korant Bild na Alemania, e hòmber Norman Franz, kende ta fugitivo pa 22 aña a wòrdu mirá riba Kòrsou pa testigunan aleman.

Segun hefe di komunikashon na polis Imro Zwerwer, te ainda nan no a risibi ningun notifikashon di esaki. Durante fin di siman, un foto di Franz tabata sirkulando riba ret sosial. Interpol i Ministerio Públiko na Alemania i Portugal ta buskando Franz pa un seri di krímen unda vários persona a bin pèrdè nan bida. Pero durante 22 aña,Franz a uza diferente aparensia pa por logra despista hustisia di Oropa. Na e momentonan aki Franz tin 51 aña di edat. Segun e korant BILD, tabata un turista aleman kende a informá un investigadó na e Unidat Federal Anto Krímen na Rijn. E investigadó en partikular ta buskando Franz pa kasi 14 aña. E la deskribí Franz komo un persona inteligente i tin bon manera ku damasnan. Pero tras di su kara tin un aspekto peligroso i karakter sin piedat. Na 1995 por ehèmpel el a rementá un vehíkulo ku dos persona aden tirando un granat di man despues di e diskutí ku nan riba entrega di sigaria. Na 1997, despues di un huida fo’i prizon Franz a mata diferente vigilante durante robo di sèn tirando dirigí riba su víktimanan sin duna nan niun chèns di reakshoná. El a wòrdu arestá na dos okashon i logra skapa, kual e último for di un prizon na Portugal. Na ámbos okashon su eks kasá Sandra a yud’é ku un zag pa e por logra kòrta e baranan di heru na su sel i skapa.

Segun e publikashon den Bild por konkluí ku tabata for di aprel 2021 testigunan a mira Franz na Kòrsou. Te ainda ni na Interpol i tampoko na Kuerpo di Polis no tin niun informashon riba e notisia ku a sali publiká den Bild.