OSTPÙNT—  Un plan spesífiko, kon ta bai desaroyá e parti bendí na Ostpùnt, no ta konosí. Ademas, segun Willie Maal e no tin di haber ku e parti ei. Esaki ta lokual e la duna di konosé na Vigilante.

Manera publiká den Vigilante for di 11 di Mei último, Grupo Maal tabata negoshando pa bende parti di nan tereno na Ostpunt. Na promé instansha Willie Maal a ninga, pero despues Vidanova mes a emití un komunikado unda despues Maal bin atmití. Den un reakshon kòrtiku na Vigilante siman pasá. e la enfatisá ku e ta hala atras riba e parti di desaroyo, pa lokual ta trata e sekshon ku nan famia a bende.  Maal a bringa hopi aña pa por a logra bende un sekshon di nan tereno.

Ta konosí kaba ku, Fondo di penshun Vidanova a kumpra parti di Ostpùnt. E fondo a kumpra e parti mas pa sùit di e terenonan na Ostpùnt, ku for di 1868 ta den man di famia Maal. Ta trata aki di un pida tereno di alrededor di 1000 hèktar. Segun Vidanova, en bista di e embergadura di e área, e kompra ta brinda un oportunidat úniko pa durante bastante aña garantisá un desaroyo ekonómiko i sosial fuerte, i responsablemente duradero. No solamente e desaroyo ei lo benefisiá e partisipantenan na e Fondo di penshun, pero tambe henter komunidat di Kòrsou. Na e momento aki i den e fase aki Vidanova ta limitá na e anunsio breve, pero na su debido tempu lo divulgá mas informashon di e plannan ku awor nan por sigui traha ariba.

Ku e benta, Kòrsou ta na punto pa inisiá unu dje bentanan di bienes inmóbil mas grandi den último 30 aña. Segun Maal, semper tabatin interes i interesado serio pero grupitonan ku agènda skondí a trata i logra na stroba i opstakulisá tur kos. Tin masha hopi redu i informashon i inkorekto aparentemente”., segun Maal a duna di konosé . Den pasado Maal tabatin hopi guera pa bende. Organisashonnan ambiental i fundashonnan ambiental supsidiá pa gobièrnu pa hopi aña a bringa pa opstakulisá famia Maal di bende òf ehekutá proyekto riba e tereno. Un seri di kasonan den korte i apuntashon ilegítimo di zona ambiental na kosta sùit, tabata destiná pa e organisashonnan ambiental trata na ehersé nan propio negoshi di buseo i di turismo. Entre otro organisashonnan ambiental tabata planeando un proyekto di buseo internashonal pa e área di Ostpùnt, sin konosementu di famia Maal.For di desèmber 2021, despues di un veredikto den korte sivil, Gobièrnu di Kòrsou a gana un kaso kontra di diferente di e organisashon, unda a duna outorisashon pa kambio den destinashon di e área. Esei a habri posibilidat pa kuminsá bende.