Willemstad,– E bosero di Curoil/Curgas señora Sabine Curiel a splika den medionan di komunikashon ayera ku ta hopi hende ta haña gas di 100 liber normal i ku no tin skarsedat pa loke ta gas di 20 i tampoko di 100 liber.

E bosero di Curoil a bisa ku tur hende por ta trankil, paso no ta bèrdat ku tin skarsedat di gas.

E ta splika ku mirando ku e demanda ta hopi grandi den dianan aki di fiesta kombiná ku e echo ku Curoil/Curgas tambe ta konfrontá ku e efekto di Covid-19, por dura un poko èkstra pa e kliente risibí su gas, pero no ta asina ku tin skarsedat di 20 i tampoko 100 liber.

Curoil/Curgas ta spera ku pa den kuminsamentu di yanüari mes tur kos lo ta normal atrobe, mirando ku a tuma algun personal adishonal pa asina por hasi entrega. Ta rekomendabel pa yega i òf kumpra gas den oranan di mèrdia ku ta un poko ménos drùk. Señora Curiel ta bisa ku por ehèmpel na Curoil Muizenberg por yega i entregá 325 bòter di gas di 20 liber pa dia i ku esakinan ta kaba promé ku mèrdia, pues tin un demanda hopi grandi e dianan aki.