WILLEMSTAD- 14 di sèptèmber 2021 – Den un ambiente ameno na Área di Rekreashon Marie Pampoen, Ofisina di Turismo di Kòrsou (CTB) a lansa su kampaña di konsientisashon titulá ‘Kòrsou ta dushi i limpi’. Nos por alkansá un pais limpi basta nos tur duna di nos parti. Limpiesa di Kòrsou ta nos tur su responsabilidat. P’esei lema di e kampaña ta: ‘Huntu nos ta tene Kòrsou limpi!’

Durante di e evento Minister di Desaroyo Ekonómiko, sra. Ruthmilda Larmonie – Cecilia a para ketu na e importansia di un Kòrsou limpi tantu pa nos mes komo habitante pero tambe pa e turistanan ku ta skohe pa bishitá Kòrsou. Sr. Hugo Clarinda, direktor athunto di CTB a duna informashon referente e trayekto di limpiesa ku tambe ta forma parti di e totalidat di ‘Kòrsou ta dushi i limpi’. E trayekto di limpiesa ta inkluí limpiesa di diferente área públiko, rotònde, plenchi i áreanan turístiko. Ehekushon di e trabounan di limpiesa ta tuma lugá den estrecho koperashon ku Selikor, GMN/LVV i DOW. E promé fase di e kampaña di konsientisashon ‘Kòrsou ta dushi i limpi’ ta inkluí un video clip, spòtnan ku mensahe inspirativo, jingle i avisonan ku tep pa stimulá pa tene limpi. E jingle a keda komponé pa Xavier Navarro i e kantantenan ta Amos Balentin i Dibo Doran. E video clip i e spòtnan a keda dirigí pa Ryan ‘QD’ Navarro. E  parti di bos tabata na enkargo di Jefterick Luciano. E promé 3 spòtnan inspirativo ta inkluí Clarita Pieter – Hagenaar di Uniek Curaçao, Frengely ‘Frengo’ Hooi di Selikor i Remyson Caldera di GreenKidz. Durante e lunanan benidero lo sigui produsí mas spòt i tambe videonan informativo ku e meta pa motivá nos pueblo pa tene nos pais limpi.