Punda  – Korte Supremo di Repúblika Dominikana a aprobá ekstradishon di un di e lidernan di e organisashon kriminal ‘No Limit Soldier’ (NLS) ku inisialnan U.L.W. (Nuto Wawoe) pa Kòrsou. U.L.W. a keda ekstraditá pa Kòrsou.

7 di febrüari 2023 outoridatnan di Kòrsou a pidi outoridatnan di Repúblika Dominikana pa ekstradishon. E prosedura di ekstradishon di U.L.W. a dura mas ku un aña pa motibu ku U.L.W. a

disidí di bringa e ekstradishon. Ku esaki un otro parti di e investigashon THEMIS ku ta andando, a keda konkluí. Investigashon THEMIS ta un investigashon di un organisashon kriminal ku supuestamente ta involukrá den provoká o kometé asesinato, trafikashon di droga na gran eskala i labamentu di  plaka tantu na Kòrsou komo na Sint Maarten. Den investigashon THEMIS parti I, ya a kondená 4 sospechoso. Dos sospechoso a apelá. E investigashon ta andando i no ta ekskluí mas detenshon.

Tratamentu di investigashon THEMIS parti II i parti III lo sigui respektivamente den òktober i desèmber 2024.