Willemstad——Tur aña, OMNI ta bishitá diferente instansia pa hasi donashon. E aña aki, a toka turno na Fundashon Kas Pa Mayor di Nos Mayornan i Justitiële Jeugd Inrichting Curaçao.
Na Fundashon Kas Pa Mayor di Nos Mayornan, ku ta duna kuido i servisio esensial pa nos grandinan, OMNI a entregá un wasmachine i un rice cooker komo donashon. E donashon ta destiná pa yuda na mehorá bienestar i kalidat di bida di e residentenan. A trata di un mainta masha plasentero, kaminda lidernan i residentenan di e institushon a risibí OMNI ku brasa habrí. Además, OMNI a risibí un rondleiding den e institushon, ku a duna un perspektiva mas profundu di kon nos grandinan ta biba. E instituto a mustra un lugá limpi i organisá, ku un ambiente masha ameno pa e grandinan. E bishita a kulminá ku un momento di gratitut, ku un tremendo alabansa pa gradisí nos Kreador pa tur loke e ta sigui hasi pa nos.
Na Justitiële Jeugd Inrichting Curaçao (JJIC), un instansia dediká na rehabilitashon i reintegrashon di hóbennan den kuido hudisial, OMNI a kontribuí ku donashon di un frishidel i un blender. E donashonnan ta ku destinashon pa fortalesé i duna sostén na e hóbennan ku ta forma nos siguiente generashon. Durante e bishita, empleadonan di JJIC a duna informashon detayá tokante e funshonamentu di e institushon i nan eksperensha den e trabou ku nan ta realisá.
“Nos meta ku e donashonnan aki ta pa apoyá e trabou inkreibel ku e institushonnan aki ta realisá,” según Eugene Valpoort, Marketing Manager di Unicomer/OMNI. “Nos ta kere den duna bèk na e komunidat ku ta sostené nos.”
Lidernan di e dos institushonnan a ekspresá nan gratitut pa e generosidat di OMNI.
E esfuerso aki ta parti di e kompromiso kontinuo di OMNI pa pone e bienestar di komunidat na promé lugá i pa demostrá responsabilidat korporativo den un manera signifikativo i ku impakto.