Akuerdo firmá ta na vigor te na 2027.

WILLEMSTAD – E akuerdo ku ta remplasá COHO yamá ‘Onderlinge Regeling’ (OR) a drenta na vigor ayera i den prinsipio lo ta na vigor pa 4 aña, esta te ku 3 di aprel 2027. Konforme artíkulo 11 dje akuerdo, despues di e fecha akí tin e posibilidat di alargá e periodo ku un máksimo dos aña kada bes. Lo tin un evaluashon di e akuerdo despues di 3 aña, manera stipulá den artíkulo 10.

Den e akuerdo mutuo tin ademas un protokòl di protekshon legal. Den e akuerdo mutuo a establesé ku ta apliká e Lei di Derecho atministrativo general (Algemene wet bestuursrecht) meskos na e provishon di finansiamentu di parti di Hulanda pa proyektonan i medidanan di reforma (artíkulo 9). Sekretario di Estado Alexandra van Huffelen ta splika: “E eskoho akí ta un kontinuashon dje práktika eksistente durante e último añanan relashoná ku finansiamentu di proyektonan di derecho públiko di parti di Hulanda den e paisnan. E konsekuensia di e eskoho akí ta ku e órganonan atministrativo di Karibe ku por ta konsiderá komo partidonan interesá den un desishon di finansiamentu, por rekurí na Korte Atministrativo hulandes si surgi un disputa tokante e desishon tumá.”

Mirando e relashon hurídiko spesial di kua ta trata akí, no por afirmá di antemano ku 100% sertesa ku Korte Atministrativo tambe lo konsiderá su mes outorisá pa tuma konosementu dje disputa. “No ta eksistí presedentenan legal pa ku esaki. Pa evitá un buraku den e protekshon legal relashoná ku un disputa spesífiko, e gobièrnunan a traha un protokòl. Den e protokòl akí, e gobièrnunan a akordá ku den un situashon asina, lo ahustá e areglo mutuo OR di tal manera ku ta mantené e posibilidat di protekshon legal pa e paisnan di Karibe.” Van Huffelen a entregá e protokòl akí tambe komo anekso, huntu ku su karta na Tweede Kamer splikando e proseso i kontenido dje Onderlinge Regeling.

Progreso ehekushon
E karta di Van Huffelen ta inkluí tambe e promé Rapòrt di Ehekushon pa 2023 i e Agèndanan di Ehekushon ku akuerdonan pa e segundo trimèster dje aña akí. “Esakinan ta e último agèndanan i rapòrtnan trahá bou di e régimen promé, esta promé ku e akuerdo mutuo OR a drenta na vigor. Ta mantené e sistema dje agèndanan i rapòrtnan di ehekushon durante e próksimo 4 añanan, pero for di awó lo traha e rapòrtnan di ehekushon, meskos ku e agèndanan di ehekushon konhuntamente.”