Back to Top
Responsive image
E korant di pueblo

Ora Girigorie ta papia di fake news Rhuggenaath ta papia di Lockdown


November 28, 2020 • 2 minüt pa lesa

Rhuggenaath: si situashon di Covid eskala ta bini un lockdown

Punda—Segun minister Girigorie Kòrsou lo no pone un Toke de Keda 6’or ni tampoko nunka mas lo bai na plachi di dia. Esaki segun e minister ta un “fake news”. Aló ménos esei ta lokual e minister a laga sirkulá riba retnan sosial, despues ku Vigilante no tabata por a lokalis’é.

For di informashonnan bastante verídiko, Vigilante a risibi e notisia ku ya kaba tin evaluashon si e situashon di Covid na Kòrsou eskala, Plachi di Dia ta bini bek i ta pensando na trese e Toke de Keda na 6’or. Reportero di Vigilante a trata na risibi un reakshon di minister di hustisia, Quincy Girigorie pero no a logra. Den un reakshon ayera e afirmá di tabata den un entrevista na radio i no tabata por a reakshoná.

Ayera e minister a sirkulá e artíkulo di Vigilante i menshoná ariba “fake news”. Na diferente okashon, e minister no ta alkansabel pa reakshon pero esei ta su opshon personal, pero un dia anterior minister Eugene Rhuggenaath a konfirmá si e situashon bira mas fuerte,e desishon di Lockdown ta den su man! Kon un minister di hustisia por ta konsiderá Plachi di Dia i Toke de Keda komo fake news, miéntras Promé Minister ta konfirmá un lockdown di e situashon di Covid eskala. Vigilante ta enfatisá un biaha mas: si e situashon di Covid eskala na Kòrsou ta bini un lockdown i rekonsiderashon di introdusí plachi di dia kombiná ku un toke de keda mas tempran. Anto esei NO ta un fake news. Ademas hasta Izzy Gerstenbluth a konfirmá den mesun rueda prensa si eskalashon sigui lo “frena mas”. Awor kiko ta Fake News keda sin lokalisá un minister ku nunka no ta kontesta?

Login