Back to Top
Responsive image
E korant di pueblo

Organisashonnan ku ta traha na bienestar di personanan ku desabilidat a uni


November 19, 2020 • 2 minüt pa lesa

Pa pone atenshon riba dia internashonal di personanan ku un desabilidat

Punda– Nashonnan Uní a proklamá 3 di dezèmber komo dia Internashonal di personanan ku un desabilidat. Na Kòrsou mes tin mas ku 10mil hende ta biba ku un òf mas desabilidat. Sea ku ta via un aksidente, malesa òf di nasementu. Entre nan tin diferente persona ku apesar di su sirkunstansia tòg a sali pa dilanti i ku tin un bida felis i kompletu.

Den kuadro di esaki diferente organisashon a bini huntu pa e dia aki produsí un transmishon nashonal pa selebrá e abilidat nan di personanan ku un desabilidat. 3 organisashon a bin huntu for di aña pasá pa organisá un feria ku lo a trese huntu tur e organisashonnan ku ta traha na bienestar di personanan ku un desabilidat pa asina informá i konsientisá  komunidat riba tur e posibilidat ku tin na Kòrsou tokante desabilidat.

Manera nos tur sa, e aña aki tabata unu eksepshonal ku a eksigí un aserkamentu diferente. Pa e motibu aki a lanta e idea pa na lugá di hasi un feria, transform’é den un programashon ku lo keda transmití bibu pa 6 ora largu. Nashonnan Uní a proklamá e dia internashonal di personanan ku un desabilidat na aña 1992 ku e meta pa promové e derechi i bienestar di personanan ku un desabilidat den tur gremio di komunidat, oumentá i konsientisá tokante e situashon di personanan ku tin un desabilidat.

Den kuadro di esei a uni un total di 11 organisashon di Kòrsou ku ta traha na bienestar di e diferente desabilidatnan ku tin. Nos ke transformá  e persepshon ku tin di e persona ku desabilidat. Pa mustra e abilidat di e personanan i kon nan ta aportando den nos komunidat sea ku ta via nan talento, trabou òf asta negoshi.

Un transmishon di 6 ora largu na diferente medionan di prensa ku mas i mas ta uni pa den kadena selebrá e abilidatnan di personanan ku un desabilidat na Kòrsou.  Reservá e fecha 3 di dezèmber riba un djaweps pa den e ambiente di bo kas òf trabou, kaminda bo ta via tv, radio òf media nan sosial bo por sintonisá e selebrashon di abilidat pa promé bia.

Login