Back to Top
Responsive image
E korant di pueblo

ORV a entregá sertifikado Criminologie den presensia di Minister di Hustisia


December 22, 2020 • 2 minüt pa lesa

Rio Canario– Resientemente vários lider riba nivel 5 i 6 den Kuerpo Polisial Kòrsou, Kustwacht, Landsrecherche i ORV a pasa e materia Criminologie.  Djaweps 17 di desèmber tabatin entrega di sertifikado na 43 funshonario ku a pasa e kurso/materia menshoná ku éksito.

E entrega di sertifikado a tuma lugá den kantine di Opleidingsinstituut Rechtshandhaving & Veilidheidszorg (ORV) na Rio Canario den presensia di Minister di Hustisia sr. Quincy Girigorie. Na e okashon aki tabata presente direktor di ORV, sra Falbru i Hefe di Kuerpo Polisial Kòrsou sr. Ellis.

Promé ku e entrega di sertifikado a dirigí palabra sr. Raindell Martina, hefe di Specialistische Opleidingen & Leiderschapstrajecten di ORV, sr. Raymond Ellis, hefe interino di Kuero Polisial Kòrsou, sra. Alpha Falbru direktor di ORV i Minister di Hustisia.  43 kandidato di e instansianan ariba menshoná a pasa e materia ku éksito i risibí nan sertifikado den 3 diferente grupo, teniendo kuenta ku distansia soshal den kuadro di Covid-19. 

Ta di 15 materia den kuadro di formashon di lidernan di e kuerponan riba nivel 5 (HBO AD) i 6 (HBO BA. Promé ku e materia aki durante añanan anterior tabatin materianan “Persoonlijke en Inspirerend Leiderschap”, “Kwaliteitsdenken”, “Organisatiekunde”, “Beleidskunde”, “Verandermanagement”, “Cultural tolerance and organizational culture”, “Human Rights”, “Politie, Bestuur en Beleid”,  “Rol PV in strafprocesrecht”, “Jongeren en gewelddadig en/ of seksueel afwijkend gedrag”, “Forensische Psychiatrie”, “Integrale Veiligheidskunde”, “Criminologie” i resientemente Politie en Gender.

Den e materia aki e studiante a sera konosí ku estudio/siensia di e komportashon di esnan ku ta faya ku lei, e reakshon di e víktima, e komunidat i gobièrnu.  Atenshon ta keda poné riba aspektonan manera  sikologia, sosiologia, biologia, antropologia,  ekonomia i estudionan di lei. Diferente disiplina di kriminologia ta bini dilanti durante e kurso i e partisipantenan ta haña mihó bista i idea riba e teorianan den kriminologia.  Hopi importante ta e tema Kriminalidat Organisá.  Kriminalidat (krímen) Organisá ta un tópiko aktual mirando e desaroyonan di krímen organisá den Amérika Sentral i Suramérika.

Investigashonnan hasi ta mustra kon grupo i gangnan ta operá por ehèmpel na Meksiko, Honduras, Guatemala i Venezuela, esaki tin konsekuensia pa tur tipo di trafikashon ilegal den region di Karibe.  
E kresementu di e krímennan organisá ta kombiná ku violensha ekstremo ta yega na Kòrsou tambe i tin konsekuensia visibel riba e manera di biba den bario nan.  Durante e kurso ‘Kriminologia’ a para ketu tambe riba efektonan di krísis di Corona riba e kriminalidat.  Na final di a materia aki e kandidatonan a pasa un eksamen.

Login