WILLEMSTAD—-  Señor Sheldry Osepa, miembro di frakshon di Partido Nashonal di Pueblo, ke pidi bo atenshon pa lo siguiente. Konstantemente rapòrtnan di e Organisashon Mundial di Salu (World Health Organization) ta mustra riba e echo ku komementu di karni kòrá òf karni prosesá ta malu pa salu.

E estudionan ta mustra ku karni prosesá ku salu, karni humá, fèrmentá òf ku ta amplia e sabor òf yuda konserva e karni por yuda trese kanser.

 For di e informashon ta mustra ku komementu di karni prosesá por subi riesgo di kanser na stoma. I komementu di karni kòrá por oumentá kanser na pankreas òf prostat. Aunke karni tin sierto balor nutriktivo importante bou di kua proteina, mineral i vitamina (B12) tòg estudionan ta mustra ku konsumo haltu di karni kòrá ta subi riesgo di diabetes, malesa di kurason, malesanan króniko i sierto kansernan. Esaki sigur den komparashon ku komedónan di mas galiña òf piska.

P’esei ta rekomendabel pa kome ménos karni kòrá i mas karni blanku. 2 Konsiderando tur esaki i hasiendo uso di e derecho di hasi pregunta manera stipulá den artíkulo 96 di Reglamento di Orden i tambe artíkulo 57 di nos Areglo di Estado, suskrito lo kier hasi na minister e siguiente preguntanan:

1. Kiko ta e maneho di gobièrnu pa konsientisá pueblo riba komementu di karni kòrá òf prosesá?

2. Kiko ta e maneho di gobièrnu pa demotivá komementu di karni kòrá mirando e rísikonan pa salú?

3. Gobièrnu ta na altura ku Organisashon di Salu Mundial (WHO) ta deskonsehá hopi konsumo di karni kòrá o karni prosesá?

4. Gobièrnu ta na altura ku komementu di hopi karni ta oumentá chèns riba kanser na tripa?

5. Kiko ta e alternativanan ku yunan di Kòrsou tin den kaso ku mester mengua nos konsumo di karni kòrá òf karni prosesá?

6. Ki efekto ousensia di komementu di karni kòrá lo tin pa nos medio ambiente?

7. Gobièrnu ta pensa riba insentivá pa stimulá nos poblashon na un dieta ku ménos òf sin karni prosesá òf karni kòrá?

8. Kiko ta e plan di gobièrnu pa mantené e preis di kuminda barata di kua preis di karni i tambe preis di alternativa pa karni?

Gustosamente lo mi kier risibí kontesta riba e preguntanan akí, pa asina suskrito por sigui atendé e tópiko akí. Sperando riba un kontesta ku e rapides nesesario, suskrito ta keda.