Bullenbaai—Pa nèt otro siman e kontrakt entre CPR i CRU pa maneho di Bullenbaai ta bai kaduká. No ta konosí ainda si RdK/CRU lo prolongá e kontrakt. Ta trata di un kontrakt mensual di 1.2 mion dòler.

Riba 2 di ougùstùs 2022, e grupo di Giusti a firma un akuerdo ku Curaçao Refinery Utilities pa hür Bullenbaai. Caribbean Petroleum Refinery,  tin un akuerdo di tur kos inkluí pa por aloká krudo òf kombustibel (fuel oil) na Bullenbaai. Esaki ta lokual por konkluí for di dokumentashon. Kontrali na lokual a sali publiká, CPR debidamente ta pagando nan kota di lease mensual. E akuerdo ta trata di un proposishon di hür básiko na 2.1 mion florin (1,2 mion dòler) mensual. E suma aki ta ekivalente na 18 sèn dòler pa bari di e kapasidat total ku tin na Bullenbaai.

Pero e dil di tin tur kos inkluí, por nifiká ku Caribbean Petroleum Refinery, te ainda no tin obligashon di invertí miéntras e ta pagando un suma fiho pa por uza 11 tanki na Bullenbaai. Aparte di e hür pa e fasilidatnan na Bullenbaai, entre CRU i CPR tin un proposishon pa paga èkstra kota di kosto na 550 dòler pa kada ora di karga i deskarga na jetty (nan) di Bullenbaai.  E akuerdo a keda firmá riba 2 di ougùstùs 2022. Riba 27 di sèptèmber, partidonan a trese un kambio den e akuerdo.