Back to Top
Responsive image
E korant di pueblo

OTRO YAMADA PA E TEP DI ORO: REKOMPENSA A SUBI BIRA 30.000 FLORIN


January 29, 2021 • 1 minüt pa lesa

Willemstad– Dia 6 di yanüari 2021 Ministerio Públiko (OM) di Kòrsou a saka un komunikado relashoná ku e robo di sentenares di kilo di kokaína for di Warda di polis di Rio Canario.

A anunsiá ku lo duna un rekompensa di un máksimo di 20.000,- florin na esun ku por duna informashon krusial relashoná ku e robo aki. E personanan ku a mèldu no tabata dispone di e informashon ku a kondusí na e tep di oro. E tim di investigashon ku ta konsisti di reshèrshi di RST i Buro Asuntunan Interno di KPC (Bureau Interne Zaken), a konstatá ku aunke tin hopi informashon, hendenan no tin sufisiente konfiansa pa kompartí e informashon aki ku e tim.


Un bes mas Ministerio Públiko kier pone atenshon na e kaso aki i kier remarká ku lo ta hopi kouteloso ku e informashon ku suidadanonan por duna tokante e kaso. Naturalmente tambe ku e suidadanonan mes tambe ku ta dispuesto pa hasi esaki. Por yama of manda whatsapp na e siguiente number: +5999 521 3865. Si bo ta prefera di keda anónimo, por yama e siguiente number: +5999 679 2896.


Kompletando e komunikado anterior, Ministerio Públiko ta duna suidadanonan tambe e posibilidat pa yama OM dirèkt ku informashon tokante e kaso. Speshal pa esaki a apunta un fiskal ku bo ta haña na telefòn ora bo yama e siguiente number: +5999 521-2109. E number aki ta solamente si bo tin informashon di e robo di droga ya menshoná.


Alabes Ministerio Públiko ta anunsiá ku e rekompensa a subi bira 30.000, florin pa e tep ku lo duna un kontribushon esensial pa solushoná e kaso.

Login