Gráfiko ilustrando averahe di kasonan di infekshon, por mira un oumento di kaso e último dianan.

PUNDA- Durante Relato di dia ku a tuma lugá ayera, epidemiólogo lokal Dr. Izzy Gerstenbluth, a duna di konosé ku e kantidat di kasonan aktual ta oumentando.

Kontrali na loke outoridatnan lokal a ferwagt e kantidat di kasonan nobo pa loke ta trata  infekshon ku e vírus di Covid-19, ta oumentando atrobe. E último dianan aki e tim di epidemiologia ta registrando un kantidat di kontagio nobo pa dia enbes di un redukshon manera tabata e kaso siman pasá.

E oumento aki ta trese preokupashon grandi debí na e oumento di hospitalisashon ku esaki por trese kuné. Análisis di hospitalisashon kousá pa e ola aktual di Covid-19 ta mustra ku mayoria persona ku keda hospitalisá no ta bakuná. Entre 22 di yüli te ku 13 di sèptèmber 151 persona a keda hospitalisá pa motibu di Covid-19. Di e personanan aki 141 persona no tabata bakuná, 4 a risibí solamente un dósis di bakuna, 1 persona a keda infektá denter di dos siman ku a risibí e segundo shòt di bakuna i 5 persona tabata kompletamente bakuná. Di e 5 personanan kompletamente bakuná, 3 persona su sistema inmunológiko ta perhudiká. Manera ya Dr. Gerstenbluth a informá durante seshonnan anterior, personanan ku un sistema inmunológiko débil no ta sufisientemente protehá ku dos shòt di bakuna. Pa e motibu aki ekspertonan internashonal ta deliberando un shòt adishonal pa e grupo aki.

Mirando e sifranan di hospitalisashon por bisa ku di 151 persona ku a keda hospitalisá, 149 no tabata kompletamente protehá i 141 persona no a bakuná mes. Esaki ta resultá den un porsentahe di mas ku 98%, kual ta nifiká ku gran mayoria di personanan ku ta risibí kuido médiko pa motibu di Covid-19 no ta bakuná.

Ku e informashon aki Dr. Gerstenbluth ta enfatisá un bia mas ku tin sufisiente evidensia ku bakunashon ta baha e chèns di malesa severo hospitalisashon i morto kousá pa Covid-19.