Pa mas informashon tokante kategorisashon di pais i kondishon pa biahe bishitá www.bonairecrisis.com

PUNDA- Gobièrnu di Boneiru a publiká raportahe di kantidat di kaso aktivo di Covid-19 kaminda por mira un oumento drástiko den kasonan nobo kompará ku siman pasá. Ademas, outoridatnan a publiká un lista nobo di paisnan di riesgo.

Ya pa algun siman kaba, pa ta presis for di komienso di sèptèmber, Boneiru ta raportando oumento den kantidat di kasonan nobo di infekshon ku Covid-19. Despues di 11 di sèptèmber tabatin indikashon ku e kantidat di infekshonnan nobo a kuminsá redusí. E último dianan aki Boneiru a raportá mas ku 20 kaso aktivo nobo riba un dia. Sinembargo for di djaluna, Boneiru a bolbe kuminsá registrá un oumento drástiko den kantidat di kaso diario.

Aun no ta konosí kiko ta e motibu pa e oumento diripiente aki. Si wak bèk na análisisnan konduktá di e simannan anterior por mira ku e oumento na komienso di luna ta kousá pa algun klùster den enseñansa i personanan ku a bini for di eksterior.

Ademas, entrante di 27 di sèptèmber, Boneiru lo utilisá un lista nobo pa kategorisá paisnan abase di riesgo pa Covid-19. E lista ta distinguí kuater nivel di riesgo kual ta riesgo hopi abou, abou, haltu i hopi haltu. E nivel di riesgo ta keda determiná a base di e kantidat di kasonan di infekshon ku Covid-19 ku e pais tin.

Brazil, Venezuela, Surnam, Reino Uní i Estados Unidos ta algun di e paisnan ku ta kategorisá komo pais di riesgo hopi haltu. Pa promé bia Haiti tambe a subi e lista aktual di paisnan ku riesgo hopi haltu.

E kategoria di paisnan ku riesgo haltu, a bira mas largu ku anteriormente tabata e kaso. Kòrsou, Aruba, Sint Maarten, Hulanda, Colombia i Repúblika Dominikana ta algun di e paisnan ku ta kategorisá koló oraño, kual ta simbolisá riesgo haltu.

E islanan Saba i Sint Eustatius ta kategorisá komo islanan di riesgo hopi abou.

Pasaheronan di paisnan ku ta kai bou di riesgo hopi abou por biaha pa Boneiru simplemente ku un deklarashon di salú. Pasaheronan no bakuná di paisnan di riesgo abou, mester hasi un tèst di PCR banda di e deklarashon di salú pa por drenta e pais. Pasaheronan bakuná di paisnan ku ta kai bou di riesgo haltu, manera Kòrsou, mester hasi un tèst di PCR no mas ku 48 ora promé ku biahe i yena e deklarashon di salú pa por biaha. Pasaheronan no bakuná òf parsialmente di e kategoria aki mester hasi un tèst di PCR no mas ku 24 ora promé ku biahe òf un PCR no mas ku 48 ora kombiná ku un tèst di antígeno ku ta keda hasí na yegada. Ademas e grupo aki tambe mester entregá e deklarashon di salú. Personanan ku ta biaha for di paisnan kategorisá ku riesgo hopi haltu, mester yena e deklarashon di salú, hasi un PCR tèst i un tèst di Covid-19 despues di 5 dia na Boneiru.