Hospitalnan CMC na Kòrsou i HOH na Aruba ta anunsiá ku preshon inmenso riba personal debí na oumento drástiko den hospitalisashon ku Covid-19.

PUNDA- Situashon di Covid-19 entre e islanan CAS den Reino, Aruba, Kòrsou i Sint Maarten, ta kousando preokupashon inmenso. Esaki debí na e oumento drástiko di hospitalisashon na e islanan, ku konsekuensia ku no tin sufisiente lugá ni personal pa akapará mas hospitalisashon

Durante e último dianan Horacio Oduber Hospital (HOH) na Aruba a raportá un total di 40 pashènt nobo interná pa motibu di infekshon ku Covid-19. E oumento drástiko den hospitalisashon a pone ku outoridatnan na Aruba a anunisá ku nan a yega e kapasidat máksimo ku e hospital por akapará na kuido di Covid-19.

Aktualmente direktiva di HOH ta den negosashon ku algun agensia internashonal pa logra aloká algun personal temporal pa yuda den hospital. Skarsedat di personal ta e problema mas grandi, mirando ku aun tin kama i ekipo disponibel. Yudansa di hermana islanan tampoko no ta algu ku ta mustra posibel, mirando ku funshonarionan di CMC a anunsiá ku ya sala di kuido intensivo ta yen. Ademas, a konfigurá e sala di rekuperashon den un “ICU” adishonal.

Komparashon di e situashon aktual ku e brote anterior den komienso di aña no ta unu korekto, mirando ku e kantidat di personal ku tabata disponibel komienso di aña no tei mas awor. Pues ku alrededor di 38 persona hospitalisá  di kual mas ku 10 ta den kuido intensive, ya e preshon ta haltu riba personal kual tin konsekuensia drástiko pa kuido médiko lokal. Promé Minister Gilmar “Pik” Pisas a duna di konosé ku outoridatnan di CMC a informá Gobièrnu ku nan mester di por lo ménos kuarenta (40) zùster i ocho (8) spesialista médiko adishonal pa por funshoná i garantisá kuido optimal.