Outo ku Alberto tabata manehá kaminda outoridatnan a bin haña arma i droga.

Nieuwe Haven: Durante un kòntròl di tráfiko riba 18 di òktober 2022, na altura di Daniel, outoridat bin haña arma i droga den e akusado Alberto Eranio ( 1987 ) su vehikulo. Ta trata di 65 gram di mariwana i un arma ku ora outoridatnan a bai tèst esaki, e no tabata funshoná. Pero wes a bisa ku e arma por keda uzá pa spanta hende i por ehempel tira atrako kuné.

Tabata den oranan lat di atardi, ku polis di Banda Bou tabata tene un kontròl di tráfiko riba e kaminda ku ta kondusí pa Banda Bou na altura di Daniel. Durante di e kontròl a bin para un vehíkulo i na momento ku e polisnan a aserka e vehíkulo a tuma nota di un saku ku kontenido straño den e vehíkulo. Fiskal a splika ku segun “procèsverbalnan” trahá, ora polisnan tabata yegando serka di e outo, e akusado a bira nèrvioso, hasi un maniobrá straño dor di bira wak su yunan patras i manera ku e tabata skonde algu. Aki outoridatnan a tende algu kai i zona duru den outo. Ora nan a bai wak, tabata trata di un arma di kandela.

Alberto mes a ninga esaki, el a bisa ku ora polisnan a paré, su yunan a spanta, kuminsá yora i aki el a bira pa kalma su yunan ku tabata sintá den outo patras. E no a bai skonde niun arma. El a lubida mes ku e arma ta den outo ora el a sali kas, paso ta outo di su kasá. Segun Alberto, e ta warda e arma den e outo aki pa evitá di wardé den kas kaminda su yunan ta move konstantemente.

Alberto a sigui splika wes ku e ta un persona ku ta kria bestia i e ta uza e arma aki pa asina e por mata e bestianan mas rápido. E tin e arma solamente pa hasi esei. El a bisa wes komo e tin yu chikí na kas, e no ta warda e arma den kas pero a skohe pa wardé den su kasá su outo. Durante 2 aña largu, masha poko biaha nan a kore e kasá su outo. Bo por bisa ku e outo ta pará pornada den kurá paso e ta gasta hopi gasolin. E tin un outo mas chikí ku ta gasta menos gasolin ta move kuné. Pero riba e fecha ariba menshoná el a bai sali pa kumpra hopi kuminda pa su bestianan. E kier a stòk e kumindanan. Ora nan tabata bai sali kas, su kasá a bisé ku ta mihó nan bai ku e kasá su outo pa motibu ku esaki ta mas espasioso. Nan lo por buta e saku di kumindanan mas mihó. Nan a kore bai kumpra e kumindanan na un supermarket i ora nan tabata riba kaminda bèk pa kas, outoridatnan a paré pa hasi un kòntròl. Aki outoridatnan nan a bin haña 65 gram di mariwana kual ta pa su propio uzo i e arma di kandela ku e ta mata su bestianan kuné.

Wes mr. Snitker a kondená e akusado na 300 dia di prizon di kual 200 ta kondishonal mará na un periodo di prueba di 3 aña. Wes a bisa e akusado ku e ta haña su historia plausibel i e ta tene kuenta ku e arma no tabata funshoná.