Back to Top
Responsive image
E korant di pueblo

PAR ta reflehá riba 100 dia di Gabinete Pisas II


September 28, 2021 • 1 minüt pa lesa

Willemstad- Frakshon di PAR ta emití un komunikado analisando e promesanan di Gabinete Pisas II i bisando ku enbes di trese alivio, e gobièrnu nobo ta kometé vupá tras di vupá.

Den e komunikado aki frakshon di partido PAR ta duna di konosé ku nan a sa di respetá e promé shen dianan di gobernashon i ku den 100 dia no tin espasio mas pa esküs ni kulpa e gobièrnu anterior, ta ora pa kuminsá asumí responsabilidat.

Tambe Frakshon di PAR a agregá un lista di momentunan remarkabel di Gabinete Pisas. Den e lista aki, entre otro, a bini dilanti ku kontrali di loke Gabinete Pisas a primintí, COHO a wòrdu aseptá dia 28 di Yüni 2021. Pa despues un karta lèk kaminda ku Minister Pisas i Minister Larmonie ta informá na sr Knops ku nan no ta aseptá COHO. Al final Minister Pisas ta aseptá COHO telefónikamente, dia 3 di Sèptèmber 2021, segun e komunikado aki.

Otro puntonan ku tambe a bini dilanti den e karta aki ta ku tabata tin un proyekto ilegal di deskuento di belasting, portal di NOW no ta wòrdu habrí, tin problema ku karchi sosial, ku porfin tin un Minister di Desaroyo Ekonómiko i ahinda ta den espera pa un Minister di Hustisia miéntras ku Minister Presidente Pisas ta na delaster un fiesta i no ta komuniká ku su pueblo.

Frakshon di partido PAR ta finalisá bisando ku e lista aki en realidat ta mas largu i nan ta spera ku e promé shen dianan aki no ta un reflekshon riba e próksimo añanan di gobernashon.



Login