Parlamentario Eduard Braam ta konsehá pa uza remedinan ku ta komprobá pa un médiko.

Willemstad- Parlamentario Eduard Braam di e frakshon di partido MFK ta duna un bista mas di aserka riba e reunion di Parlatino unda komishon di seguridat i tambe di salubridat a atendé e tema di medikamentu falsifiká.

Parlamentario Braam ta splika ku e fenómeno di remedinan falsifiká tabata sali for di India i tambe China. Pero awor na Oropa tambe a kuminsá hasi esaki. Braam ta splika ku mester kuminsá pensa legislashonnan pa kontrarestá e remedinan falsu di drenta bo pais. E ta un komersio ku ta trese miones di dòler mundialmente. Braam ta splika ku un persona ku ta hasi uzo di remedinan falsifiká no sa ki efekto esakinan tin.

Delegashon di Kòrsou mester a hasi un presentashon amplio riba e tema aki kaminda a presentá e fingerprinting di remedinan kual ta un di e siensianan mas nobo ku tin aktualmente. Normalmente kriminalnan ta falsifiká e kódigo ku tin riba e empake di un remedi kaminda bo por mira ku esaki ta klòp. Aktualmente ta uzando 3D printing pa fingerprint e pulchi. Esaki ta pone ku no solamente e kódigo mester pasa e skèn pero tambe e pulchi.

Banda di Esaki Parlamentario Braam ta splika ku tin e konsepto robes di cannabis medisinal. Den e biahe ku komishon di salubridat a hasi riba cannabis medisinal por a mira ku esaki ta un modifikashon ku ta wòrdu hasí na e simia di tal forma ku bo por produsí sierto mata pa sierto malesa. Segun sr. Braam esaki ta algu ku nos lo por agregá na nos pakete tradishonal di medisina. E delegashon di Kòrsou por a mira e knelpunten ku e paisnan a pasa aden i tambe mira parti di e merkadeo. Tambe por a mira ku ta uza sierto kombinashon di e cannabis medisinal pa uza kontra epilepsia pa mucha.

Sr. Braam ta bisa ku su konklushon personal ta ku semper tin alternativa manera yerbanan natural ku tin benefisio pa un persona su salú. Sinembargo e ta konsehá pa no uza kosnan ku bo no sa  di unda nan a bini i ku ta malu pa bo salú. Si e no ta algu preskribí pa un médiko no kumpra remedinan ku no ta komprobá.

Mas aleu Parlamentario Braam ta bisa ku e Parlatino tabata unu edukativo i fruktífero kaminda e demas Parlamentarionan a trese tópikonan interesante dilanti manera e teknologia nobo kaminda interogashon ta bai di manera sientífiko. Esaki ta enserá ku ta uza métodonan sientífiko pa por saka informashon for di mente di hende. Esaki por wòrdu uzá kontra terorismo pero na e mes momentu e ta riba un nivel bastante leu di manipulashon di e persona su mente segun sr. Braam. Tambe e delegashon di Kòrsou a haña e oportunidat pa entregá nan reglamentu di òrdu ku tabata falta den e bibloteka di Parlatino.