Back to Top
Vigilante banner image

Parlamentario ke sigui ku debatenan tokante matrimonio tradishonal


May 23, 2024 • 2 minüt pa lesa

Rennox Calmes ke mira e reforsa di leinan tokante matrimonio di tradishonal pa asina evitá matrimonio di mesun sekso bira un realidat. Na Hulanda matrimonio di mesun sekso ta posibel for di 2001.

Punda,– Den un karta dirigí pa presidente di parlamento, e parlamentario Rennox Calmes ta pidi pa  agèndá e tópiko di matrimonio bèk den agènda di parlamento.

Aña pasá un dje puntonan di debate ku a risibí basta reakshon i alabes diskushon bou di pueblo tabata e diskushon nan relatá na matrimonio di mesun sekso. Ta trata di diskushon nan ku ta tumando lugá tantu na Kòrsou komo na Aruba. Na Kòrsou e organisashon Human Rights Defense a entamá un wisio sumario kontra di pais Kòrsou kaminda e diskushon tabata ku Kòrsou mester habri posibilidat di matrimonio entre personanan di mesun sekso.

Korte Komun di Hustisia a deklará riba 6 di desèmber 2022 ku disposishonnan den leinan di Aruba, respektivamente Kòrsou, no ta apliká pa asina evitá ku matrimonio entre personanan di mesun sekso ta keda ekskluí. Den otro palabra, Kòrsou mester adaptá legislashon pa asina sòru ku matrimonio den mesun sekso ta posibel. Den e veredikto aki, pais Kòrsou a apelá kaminda e diskushon aki a bai te na korte supremo ayá na Hulanda. E tratamentu sivil a tuma lugá riba 9 di novèmber 2023 i atraves di tempu diferente desaroyo interesante a bini dilanti. Ta asina ku Abogado General (AG) Gerbrant Snijders na nòmber di Prokurador General di Hulanda a saka su konklushon bastante amplio i a pidi Korte Supremo pa rechasá e apelashon di Kòrsou.

Korte Komun di Hustisia di Aruba, Kòrsou, Sint Maarten i di Boneiru, Sint Eustatius i Saba (Hof) a deklará na desèmber 2022 ku den e dos kasonan ku ta hustu pa habri e oportunidat pa matrimonio pa parehanan di mesun sekso i a ordená e paisnan akí pa regla esaki. Ni Kòrsou ni Aruba, no ta ninga òf protestá kontra e sentensia di Hof ku e limitashon di matrimonio ta kontra e prohibishon di diskriminashon, pero a limitá nan mes na e pregunta si hues por a tuma ehekutá e trabou di legislashon. Ku otro palabra si Korte por sinta riba stul dje legisladó pa asina produsí e leinan konserní.

E impakto dje diskushon nan aki, por a nota na tur nivel di nos komunidat i alabes a bai te den sala di parlamento. Kaminda e èks parlamentario Amerigo Thode(q.e.p.d) a splika ku mester simplemente warda e veredikto di korte, e parlamentario Rennox Calmes di Trabou pa Kòrsou ta tratando pa ahustá e lei pa asina reforsá matrimonio di mésun sekso. Sinembargo, Calmes ta buskando por lo mínimo 14 voto di parlamento pa asina inisiá ku e trayekto pa reforsá matrimonio di mésun sekso.

Mas aleu, Calmes a puntra e presidente di parlamento, Charetti America-Francisca, ki dia ta agèndá e reunion nan pa sigui ku e trayekto. Segun Calmes, mester kuminsá atendé e ahuste di Areglo di estado ku Frakshon i partido Trabou pa Kòrsou TPK a inisiá. Despues ku e lei a bini bek for di konseho di konsulta, mi a hasi e kambionan proponé i a entregá e lei na parlamentu pa tratamentu. E tópiko ariba menshoná ta unu fundamental pa pueblo di Kòrsou. Sigur teniendo na kuenta ku konseho di konsulta den su reakshon ta skirbi bon kla ku ta parlamento di Kòrsou ta esun yamá pa atendé e lei i ningun otro órgano òf instansia.

Login