Segun Lo Martines for di dia ku el a bini ku moshon pa stòp gastamentu di plaka di pueblo na biahenan di parlamentarionan, tin esnan ku no a keda kontentu.

Willemstad,– Parlamentario i lider di partido KEM, señor Michelangelo Martines a splika bo korant Vigilante ku ta basta Preshon a pone riba presidente di Parlamento pa saka e lista di presensia na reunionnan di parlamento. E parlamentario ta bisa ku entretantu e lista a sali i tin algun dia kaba ku el a keda publiká, pero esun (nan) ku tabata pone preshon no a logra loke e tabata ke ku e lista aki. Martines ta bisa ku “Mala Fe hamas lo por gana Buena Fe.

“Nos informashonnan ku nos tin ta mustra ku “Hackle & Jackle” ta preparando nan atake pa bin afó, pero tambe nos informashonnan ku nos ta disponé di dje ta mustra ku nan a spera e lista totalmente otro”, asina Martines a sigui splika na Vigilante.

E ta bisa ku fo’i dia ku su persona a bini ku e moshon ku a haña sosten den parlamento i asina stòp “Hackle & Jackle” su wega di drumi den penshon di 20 dòler pa di e forma ei keda ku plaka di pueblo, nan no a keda kontentu i ta buskando di tur forma pa bini bèk pero sin por logra.

E parlamentario ta bisa ku nan a purba ku entre otro:

1. Moshon pa tene èks detenido pafó di Parlamento.

2. Un menasa falsu.

3. E lista di presensia na reunionnan.

Por último e lider i parlamentario di partido KEM ta bisa pa Ban warda wak kiko ta e siguiente paso, pasó te ainda nan no por logra “pero un kos si un parlamentario den oposishon tin nan sofoká”, asina el a tèrminá bisando.