WILLEMSTAD,– Den kombersashon ku Parlamentario Michelangelo Martines, el a splika nos ku  parlamentario Doran i parlamentario Gerard huntu ku su pèrsona, pues nan tres so no ta sufisiente pa para e abusu di plaka di Pueblo.

Segun Martines mester para tur biahe pa Parlatino anto esun ku si ta haña ku tin un biahe di balor i ku mester asistí na e reunionnan aki, mester hinka man den su saku i kubri tur su gastunan e mes.

Martines ta splika ku el a bai un biaha i no ta mira e nesesidat ni importansia di e biahe nan aki. El a  splika Vigilante ku e biahe nan ei ta biahe nan di plaser, parlamentarionan ta bai keiru i bini bèk sin nada di informashon.

E ta sigui bisa ku e no ta kontra ku niun parlamentario kier biaha, pero nan mester hasi esaki ku nan propio plaka i no ku plaka di pueblo. E ta bisa kon mandatario i parlamentarionan pir ta bisa ku kos ta malu, i nan mes ta biaha kada ratu gastando e plaka di pueblo.

Isla

Pa loke ta Refineria isla e parlamentario ta bisa ku e tin gana di sa ki dia gobièrnu ta sali i bisa e bèrdat. Vigilante a puntra Martines kiko ta e bèrdat i el a splika nos ku e bèrdat ta ku e refineria lo no habri nunka mas. “E ta duru p bisa ruman, pero ta esei ta e bèrdat, ta esei ta loke gobièrnu di Hulanda a manda bisa Kòrsou”, asina Martines a duna di konosé.

E lider di partido KEM a splika Vigilante ku tin pruebanan ku Hulanda a manda bisa bon kla ku e refineria sigur lo no por habri na e sitio kaminda ku e ta aktualmente i e ta bisa ku gobièrnu mester sali buska pueblo i splika e trahadónan ku tin hopi aña kaba ta wardando i sufriendo.

Gobiernu

Pa loke ta e gobièrnu aktual Martines a bisa ku e ta desepshoná paso el a kere ku di bèrdat e gobièrnu aki lo a bai ta otro, pero nan ta meskos òf te hasta pió ku esnan anterior. Martines a bisa Vigilante ku miéntras e komportashon di e votadónan sigui asina, Kòrsou lo no haña un gobièrnu ku ta wak interes di pais nunka. “Nos mester vota pa polítikonan nobo, partidonan nobo pa asina nos haña hendenan nobo ku ideanan nobo i plannan nobo”, asina Martines a splika.

E ta bisa Vigilante ku e no ta pidi pa vota pe, pero vota pa partidonan i hendenan nobo di manera ku por bini kambio den pais, ku e mesun polítikonan di semper nos no ta bai kambia e pais nunka mas. No ta bai pa partido, ta bai pa e polítiko, pues si no vota pa hende nobo, Kòrsou lo sigui riba e mesun rumbo”, asina Martines a tèrminá bisando na Vigilante.