WILLEMSTAD,—Aña 2020 ta tras di lomba i 2021 a inisiá, pero ainda mundu kompleto ta den e gara di e pandemia global di e Corona virùs (COVID19). Aña 2021 ta brindando e perspektiva pa e bakuna ku lo por trese un dominio riba e kontagio di e vírùs aki.

Meta di e bakuna ta pa aktivá e sistema imunologiko di defensa kontra malesanan pues duna protekshon kontra di e vírùs ku ta kousa Covid-19. Esaki mester redundá den ménos kasonan mortal, ménos hospitalisashon i ménos personanan ku pa motibu di malesa lo ta inkapas pa ehersé nan labor òf nan aktividatnan diario, pues ku ménos impakto riba e produktividat individual i esun kolektivo den nos pais pa ku e aspekto ekonómiko tambe. Esaki ta un forma tambe naturalmente pa yega na kontròl riba gastunan di salubridat públiko, ku pa motibu di e pandemia a subi drástikamente den e último aña i lo sigui tin su impakto den aña 2021.

Na Kòrsou nos pueblo tambe ta den ekspektativa pa e bakunanan ku ya ta riba merkado i ku su aplikashon a inisiá kaba na diferente pais manera Merka, Inglatera, Israel i vários otro pais di Union Europeo. Manera a sali den publisidat e siman aki, 8 di yanüari próksimo bakunashon lo start den paisnan di Reino Hulandes tambe. Mi kièr aksentuá ante todo ku e desishon di kada siudadano pa tuma e bakuna ta keda unu basá riba boluntat propio, konvikshon propio, responsabilidat propio i propio sano huisio. Nunka un persona lo por wòrdu obligá pa tuma un bakuna kontra di su boluntat!