Back to Top
Responsive image
E korant di pueblo

Parlamento a pasa moshon pa hasi toke de keda 1’or i studia posibilidat pa eventonan musikal den airu liber


May 28, 2021 • 2 minüt pa lesa

Willemstad,– E reunion di parlamento di 17 di mei a kontinuá ayera kaminda gobièrnu a kontestá e preguntanan ku a ser hasi den promé tanda dia 17 di mei.

Promé minister demishonario Eugene Rhuggenaath a kontesta e preguntanan. E ta bisa ku si wak e struktura di e tim di krísis, den kaso di Covid mester a amplia esaki. E ta bisa ku aktualmente tin un adaptashon di e lei di kalamidat na parlamentu pa protehá Kòrsou mihó den kaso di kalamidat. El a bisa tambe ku pa loke ta tèrmino largu e ta spera ku 2022 pa 2025 nos lo por logra nos ekonomia di 2019.

Despues di e kontestanan di gobièrnu, parlamento a presentá un moshon ku a pasa i kaminda a urgí gobièrnu a adaptá e medidanan.

Den e moshon partidonan ta urgí gobièrnu demishonario di Kòrsou pa habri Kòrsou bèk, adaptando di un forma responsabel ‘toke de keda’ te mínimo 1’or di mardugá, alabes dunando posibilidat pa alargashon di orarionan di trùk di pan, horeca, kasinonan i demas negoshinan, mirando ku kasonan di kontagio a baha.

Tambe a pidi gobièrnu ta studia e posibilidat ku por hasi eventonan musikal, kultural, den airu liber (ménos húmedo) segun e pèrmitnan otorgá den forma responsabel.

Un otro punto ku a pidi gobièrnu traha riba dje ta pa bini ku un kontròl mas severo na aeropuerto, dor di introdusí un tèst rápido i pa studia e posibilidat i huntu ku un protokòl pa kas di grandinan i detenidonan, risibí bishita di nan ser nan kerí.

Por último e moshon ta bisa pa sigui ku e kontròl nesesario riba kumplimentu ku e reglanan stipulá.

Finalmente e moshon aki a pasa “wall to wall” den parlamento pues 18 voto pro i 0 kontra. Señor Silvania, señor Croes i señor Girigorie no tabata presente i pues awor ta na gobièrnu pa apliká e moshon den e próksimo dianan, mirando ku semper a bisa ku un moshon ta un deseo.

Login