Punda—Den un reunion maratóniko ayera, Parlamento di Kòrsou finalmente a yega na un moshon pa lokual ta trata e kondishon di Hulanda pa Kòrsou: “ratifiká e akuerdonan será na Novèmber 2020”. Esaki lo nifiká, ehekushon di Pakete di Pais, kual ta forma e parti integral den maneho di COHO.

Parlamento ayera a fórmula un moshon ku por wòrdu konsiderá komo un strategia pa skùif e aprobashon di COHO/Pakete di Pais,  den skochi di Gobièrnu. Koalishon, ayera klaramente no tabata kier a kologá nan kurpa na COHO i ordená Gobièrnu di Kòrsou pa “bai hasi lo máksimo i tur posibel pa logra trese sèn den kaha di Kòrsou”. Ayera promé di sera e reunion e siguiente moshon a keda aprobá pa Parlamento ku 19 voto pro i 0 kontra.

1. Pa urgi gobièrnu di Kòrsou pa hasi tur lokual ku ta na su alkanse den kuadro di e leinan vigente di nos pais pa haña fondo pa kumpli ku nesesidat di Pueblo di Kòrsou;

2. Pa Gobièrnu na su diskreshon kontinuá ku e negosiashonnan ku Hulanda den kuadro di sosten di likides, basa riba palabrashonnan mutuo i informá Parlamento di forma struktural.

3. Pa urgi gobièrnu pa durante e negosiashonnan aktual tokante di e sosten finansiero hasi tur lokual ta na su alkanse pa haña fondonan nesesario pa kumpli ku e nesesidat di Pais Kòrsou respetando semper e outonomia di nos pais manera ta ankrá den e Statüt di Reino Hulandes i Areglo di Estado di Kòrsou.

4. Pa urgi Gobièrnu pa durante e negosiashonnan aktual tokante kontinuashon di si sosten finansiero hasi tur loke ta na su alkanse pa haña fondonan nesesario pa kumpli ku e nesesidat di Pais Kòrsou teniendo na kuenta ku tur e puntonan di opheshon ku tantu Hunta di Konseho komo Hunta di Estado a duna, respetando semper e outonomia di nos pais manera ta ankrá den e Statüt di Reino Hulandes i Areglo di Estado di Kòrsou.