WILLEMSTAD – Hunta di Konseho (Raad van Advies, RvA) a duna konseho luna pasá riba e proyekto pa adaptá e ordenansa ku ta regla e prinsipionan di e sistema penintensiario yamá ‘Landsverordening beginselen gevangeniswezen’ (Lbg). Na ougùstùs aña pasá Parlamento a manda e petishon pa e segundo konseho riba e proyekto adaptá, despues dje promé konseho di RvA na fin di 2019. Pero RvA no ta nada kontentu ku e adaptashon hasí i a manda Parlamento hasi su tarea manera mester ta.

Despues di a lesa e proyekto di lei di frakshon di MFK i e nota di aklarashon (memorie van toelichting), RvA a konstatá ku den e nota ta referí na un gran kantidat di rapòrt, sin ku e rapòrtnan akí ta inkluí den e petishon pa risibí un konseho di RvA. Ta trata akí di e siguiente rapòrtnan: esun di Raad voor de Rechtshandhaving (RvR) di 2014; 14 rapòrt di e Committee for the Prevention of Torture (CPT) tokante problemanan den entre otro Sentro di Detenshon i Korekshon Kòrsou (SDKK); diferente rapòrt di Raad voor de Rechtspraak; i un rapòrt sin fecha di e grupo di trabou ‘Review Wet- en regelgeving gevangeniswezen’, ku SDKK a traha riba un petishon pa adaptá e Lbg.

Segun RvA, e rapòrtnan aki ta kontené ‘informashon esensial pa yena na un konseho sustantivo sólido i responsabel tokante e proyekto di lei. Den e sentido ei e visepresidente di RvA a pidi Presidente di Parlamento na òktober aña pasá pa sòru pa RvA haña tur e rapòrtnan menshoná. Dies dia despues dje petishon e Presidente di Parlamento a manda un kopia di e rapòrt dje grupo di trabou ‘Review Wet- en regelgeving gevangeniswezen’ ku SDKK a traha. Pa loke ta trata e sobrá rapòrtnan, MFK a limitá nan mes dor di referí solamente na dos pagina digital riba kua por haña e rapòrtnan.

RvA a bishitá e páginanan akí, pero e 14 rapòrtnan di CPT ku MFK ta sita i esnan di Raad voor de Rechtspraak no tabata disponibel via e lenk ku MFK a referí na dje den nan karta. Dor di klek riba e lenk RvA a haña akseso na un pagina digital di CPT ku ta brinda solamente informashon tokante e último bishita ku CPT a realisá na SDKK na mei aña pasá. “Sinembargo no por a haña e rapòrtnan riba e página digital ei. Ounke ku ta responsabilidat djesnan ku ta entregá e inisiativa dje proyekto di plei pa duna tur informashon relevante tokante e konsepto di lei na RvA, e hunta a buska e rapòrtnan riba e página digital di CPT pa por komplementá e archivo ku un evaluashon amplio.”

RvA a rekordá tur ku tin inisiativa pa kambia lei un biaha mas riba e importansia di duna RvA tur informashon relevante, pa por emití un opinion sustantivo tokante di esaki. E hunta ta komprondé ku e mundu digital ku nos ta bibando aden kada bes tin mas informashon disponibel elektrónikamente. “Ora di duna informashon na e hunta di forma digital, ta importante sí ku ta duna e informashon korekto. RvA ta yama atenshon un biaha mas pa e reglanan di maneho ku a manda anteriormente kaba tokante dunamentu di konseho riba proyektonan di lei.” E hunta a manda e reglanan akí den un karta fechá 30 di òktober 2017 na Presidente di Parlamento.

Mal kalidat

Ademas mester mehorá e kalidat dje proyekto di lei i e ‘memorie van toelichting’ tantu den sentido dje kontenido komo for di e punto di bista hurídiko. Di akuerdo ku e reglanan di maneho menshoná, Parlamento por entregá solamente proyektonan di lei kompleto. Pero e hunta a konstatá ku e proyekto di lei no tin un análisis amplio dje tema penitensiaro ku a kondusí na e presentashon dje proyekto di lei na RvA, i konsulta di literatura legal i hurisprudensia relevante. E hunta a konstatá tambe ku e nota no ta kumpli ku tur e kondishonnan sustantivo ku esaki mester kumpli kuné. “Mirando e mal kalidat dje proyekto di lei i e nota di aklarashon, mester hasi kambionan drástiko pa ku e serie di opheshonnan dje hunta. P’e motibu ei e komentarionan di RvA no ta amplio.” E hunta ta di opinion ku MFK mester tene debido kuidou ora ta traha proyektonan di lei.