PUNDA,– Ayera parlamento di Kòrsou a debatí ku komishon enkuesta HNO tokante di e resultadonan di nan investigashon ku a kuminsá for di 2021. E investigashon a keda publiká ampliamente kaminda diferente rekomendashon a keda tresé dilanti.

HNO a kosta miónes na lèsnan ku mester saka. E pregunta ta: ken a siña kiko? Den e konteksto akí di siña, e investigashon parlamentario no ta un paso ku mester balotá. E ta obligá tur hende pa reflekshoná. Echo ta ku no por drai bèk e situashon ku CMC ta aden. Pais tin un hòspital modernísimo, pero na un kosto haltísimo, i ku no ta rendabel. P’esei, no ta solamente importante pa reflekshoná pa medio di un enkuesta riba e konstrukshon i saka lès, ma tambe pa ta realístiko 10 enkuanto e hòspital ku tin pará aworakí na Hamelbergweg. E komishon ta respaldá e debate sosial ku ta tumando lugá aktualmente di ku mester hasi algu promé ku 2029. Si no yuda e hòspital aktual para riba su mes pia, e situashon di aki poko tempu no ta pinta nada bon. Ta masha urgente pa haña un solushon a korto plaso pa e hòspital por bira rendabel pa futuro serkano. Tur intento pa logra esei por konta ku e apoyo di kurason di parti dje Komishon di Enkuesta Parlamentario HNO.

Abase di e investigashon di enkuesta HNO, e komishon a konkluí entre otro ku mester reforsá parlamanto su derechi pa risibí presupuesto di proyektonan ehekutá dor di gobièrnu.Den e rekomendashon e komishon a stipulá ku Parlamento mester fortalesé su derecho di [fiha i aprobá] presupuesto, ku ta un medio krusial di kontròl, dor di sigui proseduranan eksistente na un manera mas riguroso i tambe dor di establesé un kamber di presupuesto (begrotingskamer) ku ta yuda prepará i monitoriá e presupuesto.

Mirando e proposishon aki, mesora den e reunion públiko di ayera den parlamento a krea un moshon pa asina urgí gobièrnu pa kuminsá kana un trayekto pa reforsá e derechi aki di parlamento.e moshon a stipulá ku: E trayekto aki lo keda kaná dor di un komishon sea temporal òf fiho i e komishon lo strukturá e manera ku ta atendé ku kòntròl i ehekushon di presupuesto di pais di un forma nobo. Alabes a urgí gobièrnu pa inisiá e trayekto pa trese adaptashon nan na nos lei di kontabilidat i maneho finansiero kamidna e kòntròl i outoridat prespuestario di parlamento ta keda reforsá.