Willemstad——- PATH Kòrsou ta selebrá su promé aniversario. For di su fundashon, e plataforma akí a dediká su esfuerso na eliminá trafikashon di hende i abusu na Kòrsou. Den e promé aña, PATH a logra pasonan importante pa oumentá konsientisashon, fortalesé kooperashon i implementá medidanan mas efektivo pa prevenshon.

Un aña di impakto

Durante e último aña, PATH Kòrsou a logra vários pasonan importante. Asina e plataforma a wòrdu ofisialmente lansá pa Ministerio di Hustisia, kreando un kooperashon sentral den e lucha kontra abusu i trafikashon di hende. Tambe, un proyekto di twinning ku Surinam a inisiá, ku e meta pa reforsá esfuersonan kontra trafikashon di hende i intensifiká kooperashon ku outoridatnan di Surinam. Ademas, kooperashon ku sosionan internashonal i lokal a intensifiká, inkluso den e struktura di Dia Europeo kontra Trafikashon di Hende. Ademas, basá riba rapòrtnan internashonal, PATH a desaroyá medida i protokòlnan nobo pa mehorá protekshon di viktimanan i pa logra detektá i persiguí malechor mas efektivamente.

Desaroyonan i plannan nobo pa futuro

Resientemente, Priyancka Rohera a ser nombrá komo Raportadó Nashonal di Trafikashon di Hende. Ku su eksperensia den derecho humano i maneho di migrashon, e lo tin un rol esensial den reforsá e kooperashon entre instansianan relevante i den realisashon di investigashon mas profundo tokante trafikashon i abusu di persona riba e isla. Den e aña binidero PATH Kòrsou lo sigui dediká su esfuersonan riba prevenshon, protekshon di viktimanan i persekushon di malechornan.

Aparte di kampañanan públiko i kooperashon mas intensivo ku kontrol di frontera i forsa di lei, PATH ta traha riba dos meta fundamental: Promové un rango mas haltu pa Kòrsou den e TIP-rapòrt anual (eliminando su status aktual di ‘Tier 2 Watchlist’). Adems, ta traha riba un sentro di akogida bou di supervishon di PATH, pa viktimanan por haña protekshon i sosten mas adekuá.

Pa mas informashon tokante PATH Kòrsou i kon bo por kontribuí den e lucha kontra trafikashon di hende, bishitá www.path.cw òf tuma kontakto via 692-1990 òf 679-7575.