Back to Top
Vigilante banner image

Pauletta interumpiendo Hato: Gobièrnu aktual tabata sa masha ten dje akuerdo di Warda Kosta pero no a presupuest’é


March 24, 2023 • 3 minüt pa lesa

Segun Pauletta, gobièrnu aktual tabata sa masha ten dje akuerdo di Warda Kosta pero no a presupuest’é

WILLEMSTAD – Durante e momento ku Minister di Hustisia Shalten Hato tabata kontestá preguntanan ku Parlamentario Ana Maria Pauletta di frakshon di PAR a hasi durante e reunion di 30 di yanüari último tokante e akuerdo ‘Bestuursakkoord Lange Termijn Plan Kustwacht Caribisch gebied 2019-2028’, Pauletta a hasi uso dje inovashon i interumpí Hato.

Ela hasi un pregunta aklaratorio, indikando ku gabinete Pisas 2 i porlotantu e Minister aktual di Hustisia mes tabata na altura dje akuerdo sigur for di yanüari i a firma e Plan Anual 2023 di Warda Kosta di region Karibe, den kua ta menshoná e mionnan èkstra ku mester paga. Pero tòg no a inkorporá esaki den e presupuesto deseabel (wenselijkheidsbegroting).

Pauletta a formulá tur esaki den su pregunta interumpiendo Hato durante kontestamentu di preguntanan di promé tanda tokante dikon no a hinka e gastunan dje akuerdo den e asina yamá ‘wenselijkheidsbegroting’. Komo ku e gastunan dje LTP no tabata den e presupuesto deseabel akí, e Minister di Finansa tampoko a risibí informashon tokante finansiamentu adishonal dor di Kòrsou pa sosten èkstra di Wardakosta di Karibe, pa por a hinka e gastunan den e presupuesto pa Parlamento por a trata. Asina Hato a indiká.

Nèt Hato tabata ke kontestá Pauletta riba e remarke dikon e no a kai ariba pa bai wak e dosié ora ku PAR a hasi pregunta tokante Wardakosta na tratamentu di presupuesto, ora ku Pauletta a interumpié. “Sr. Hato ta indiká den kontesta na mi persona ku e no a haña informashon ofer dje LTP i p’esei e no por a hink’é den e ‘wenselijkeheidsbegroting’.” Ela sigui splikando ku den e Plan Anual pa aña 2022 ku gobièrnu a aprobá di tur manera promé ku yanüari aña pasá, ta menshoná e LTP ku e gobièrnu aktual a akordá.

“E Plan Anual di Wardakosta di Karibe ta menshoná ku Kòrsou su aporte finansiero ta 3.84 mion euro.” Segun Pauletta ta menshoná esei den e plan anual ku gabinete Pisas 2 a akordá. “Ademas e nota di 2023 tokante e Plan Anual 2023, ta menshoná ku e gobièrnu aktual, esta Minister Hato, a sinta na òktober 2020 den Presidium i na novèmber 2022 den un ‘staffmeeting’, durante kua a papia tokante kontinuidat dje LTP.” Pa e motibu akí e Parlamentario tabata ke sa di Hato: “Kon bin e or’ei e no a wòrdu inkorporá den e ‘wenselijkheidsbegroting’?.”

Minister Hato a enfatisá ku esaki ta netamente loke e investigashon lo mester saka afó, pa loke ta trata e hinkamentu di e loke a keda akordá den e ‘bestuursakkoord’ den e ‘wenselijkheidsbegroting’. “Ami a haña sa den desèmber despues di presupuesto, ku mester paga un suma kuantioso a base dje akuerdo firmá dor di e èks-Minister di Hustisia.” Pa tur ku ke sa kon bin ni Minister Gilmar Pisas ni Hato sa ku e LTP tabata den e Landspakket (Pakete Nashonal), Hato a splika: “Ora ami a asumí e responsabilidat di Minister di Hustisia, e parti di sera un ‘bestuursakkoord’ no tabata paresé den e Landspakket mas.” Asina Hato a splika ku despues di kada periodo e tim ku ta supervisá ehekushon dje medidanan, ta baha sierto medida for di e agènda. 

Vigilante por lesa den e Plan Anual 2022 ku pa Wardakosta e Pakete Nashonal ta impliká un finansiamentu struktural pa ekspanshon planiá di akuerdo ku e LTP-P (Lange Termijn Plan Personeel), komo parti dje kòntròl di frontera. Ta trata akí dje medida H11 di e Agènda di Ehekushon, esta parti H ku ta trata fortalesé estado di derecho. Wardakosta a bin partisipá for di 2021 na práktikamente tur (sup)grupo di trabou pa elaborá plannan di akshon pa fortalesé e kòntròl na frontera. Esaki tambe ta resultado dje Pakete Nashonal.

Segun e Plan Anual 2022 Kòrsou ta karga 3.84 mion euro for di 2023 te ku 2029, ‘pa invershonnan di remplaso den e LTP-M (Lange Termijn Plan Materieel)’. E presupuesto di invershonnan den e LTP-M ta establesé den e Defensie Licycle Plan (DLP), ku pa 2023 ta 30,74 mion euro. Kòrsou ta kontribuí ku 3.84 mion euro. E presupuesto aktual ta sin e suma restante dje presupuesto di 2022, di kua ta kalkulá ku 10,50 mion euro lo bin na remarke pa ahustenan den fase.

Den e ‘Beslisnota’ ku Ministerio di Defensa a inkluí na e Plan Anual 2023 Vigilante ta lesa: “A elaborá e Plan Anual 2023 na òktober (den konteksto di Presidium) i na novèmber 2022 (staffing) den bon konsulta interdepartamental i den konsulta ku e Paisnan. Presidium a aprobá e Plan Anual. No ta spera niun problema durante tratamentu den e porta ofisial (ACKR) riba 29 di novèmber próksimo.”

Login