Back to Top
Vigilante banner image

Pèchi portugues diskubrí na Lagun


August 8, 2022 • 1 minüt pa lesa

Willemstad,– Awe den oranan di mainta piskadónan di Lagun a diskubrí pèchi portugues.

Un atvertensha ta bai na tur hende ku ta hasi uso di laman nan na bandabou pa porfabor tene kuenta ku e dianan aki, piskadónan di Lagun a diskubrí un grupo di pèchi portugues ta move den awanan den bisindario.

Den oranan di mainta algun piskadó tabata tira liña, pero dado momentu e mester a posponé su trabounan riba awa komo ku el a wak un kantidat di pèchi portugues den awa. Segun un persona ku a bishitá e playa, mester informá tur hende debí nos ta den periodo di vakashon, pues e laman nan ta drùk. Segun informashon, ta probabel ku e pèchinan di portugues ta moviendo den direkshon ost, pues e dianan aki mester wak bon na playanan manera Santa Cruz, Porto Marie i Cas Abou. Tambe personanan ku ta keda den kasnan na kosta, mester wak bon promé ku nan bula den awa for di baranka.

Pèchi portugues ta konosí di pasa den nos awanan teritorial ora bientu bòltu, pero mirando ku den wikènt tras di lomba awaseru a kai esaki tambe por tin efekto riba moveshon di e bestianan aki. Un pèchi portugues tin forma di un saku blou/ros kaminda su lomba por sali 15 cm riba awa. Pèchi portuguesnan sa move den skolnan grandi i su tenglanan por tin un lagura te ku 30 meter. Pues unabes bo wak un riba laman, preferibel informá personanan den serkania i evitá di drenta awa.

Login