Jeroen Kibbelaar: “All inclusive hotel”

Penstraat—Si na finalnan di 2003, outoridat mester a uza man duru pa por evakuá un kantidat di habitante sin pèrmit fo’i Joshi, ayera a inisiá un proyekto di 160 mion na invershon. Ta trata di konstrukshon di e hotel Autograph Collection ku lo karga 300 kamber.

Ayera na Ofisina pa Planifikashon Urbano na Skalo, Gobièrnu di Kòrsou mediante ministernan Charles Cooper i Ruisandro Cijntje a anunsiá entrega di e pèrmitnan di konstrukshon dje magno proyekto turístiko. Ta trata di un proyekto kologando kasi 8 aña den blòki di start sin por a ranka sali. Ayera durante e seremonia ofishal, Jeroen Kibbelaar di Pen Resort a konfirmá un biaha mas ku ta Autograph Collection tei lanta den Joshi Sero Bonito i lo ta un hotel “all inclusive” . Segun Kibbelaar e finansiamentu tei i awor nan tin e pèrmit den man.

Lider di Proyekto pa konstrukshon i proseder logístiko, Richard Bos a bisa ayera ku nan ta KONTENTU.  Segun Bos e konstrukshon ta tuma 32 luna i pa inisiá di 2025 por spera portanan habri na Autograph Hotel. Den 2 luna lo start ku e trabounan inisial pa despues un kantidat di 180 persona haña trabou durante konstrukshon i durante operashon di e hotel lo konta ku 350 empleado. E hotel lo pone enfoke riba e merkado estado unidense.

Minister pa Desaroyo Ekonómiko, Ruisandro Cijntje durante su disertashon kòrtiku a enfatisá riba e área históriko di Penstraat i Kas di Pueblo. Netamente einan e hotel ta ubika. Segun e minister, Autograph Collection tabata unu dje promé presentashonnan e la mira komo minister. Kas di Pueblo, ta un herensia di Partido Nashonal di Pueblo fo’i unda su karera polítiko a inisiá.  Pa tal motibu e proyekto ta unu sentimental segun Cijntje. Pa lokual ta trata e parti ekonómiko, segun Cijntje Kòrsou ta trahando duru riba e merkado estado unidense i Autograph Collection ta un èrmènt importante pa logra riba e merkado korespondiente.  Den un entrevista separá, Cijntje a splika ku e proyekto lo sostené alabes e kresementu turístiko.

Minister pa Planifikashon Urbano, Charles Cooper a duna elogio na e departamento di ROP. Ku tur kontratempu, tòg a logra pone un proyekto riba pia, e la duna di konosé. Cooper a bai bek te na 2003, na momento e tabata diputado ya Gobièrnu a duna órden pa limpia e tereno i realoká esnan riba e tereno pa un konstrukshon di bibienda nobo na Sta. Rosa-Sabana.

Despues na 2010, e la bolbe drenta komo minister unda na 2011 el a duna opshon di e tereno na Pen Resort. I awor na 2022, e mes ta esun pa kasualidat di por entrega e pèrmitnan di konstrukshon.