Back to Top
Vigilante banner image

Personal ofisina di Impuesto mester identifiká nan mes


November 7, 2022 • 1 minüt pa lesa

Entrante 22 di november benidero tur trahado di impuesto mester indentifika nan mes.

WILLEMSTAD – Den kuadro di servisio transparente na kliente, lo introdusí identifikashon obligatorio pa empleadonan di Ofisina di Impuesto (Ontvanger i Inspekshon di Impuesto) entrante 22 di novèmber 2022.

Minister di Finansa a anunsiá esaki siman pasá den un karta dirigí na Landsontvanger i Inspekshon di Impuesto. Motibu pa esaki ta e kantidat  di kehonan entregá serka minister tokante e falta di identifikashon di e personal.

Tur empleado di Servisio di Impuesto mester bisti nan badge na un kaminda visibel ku ariba nan portrèt, nòmber, fam i funshon. Na momento ku ta korespondé ku kliente via telefòn, mail of otro tipo di korespondensia e empleado mester menshoná su nòmber, fam, funshon, e-mail i liña dirèkt di telefòn. Esaki nò ta konta pa karta i aanslag outomatisá ku Ofisina di Impuesto ta manda pa kliente.

Ta e responsabilidat di Ontvanger, sr. Alfonso Trona i hefe di Inspekshon, sra. Jamila Isenia pa pèrkurá ku esaki ta sosodé i pa pone sanshon apropiá  si akaso empleadonan nò kumpli ku regla. Pa medio di e regla di identifikashon obligatorio akí minister tin komo meta pa nò solamente drecha e servisio pero tambe e struktura i uniformidat den Ofisina di Impuesto.

Login