SCHIPHOL—Ainda Schiphol ta konfrontá ku hopi skarsedat di personal. 88% di personal ta preokupá ku temporada di zomer.

Esaki segun un enkuesta di FNV bou di 427 trahadó. E sindikato ta preokupá ku e preshon di trabou, e apsentismo na trabou i risikonan di seguridat. Poko poko pero sigur e personal ta kansa, i ta teme ku nan ta bira malu, segun FNV. E sindikato tin miedu ku e preshon di trabou ta bai pa ménos trahadó, ku konsekuensia mas apsentismo (AO) na trabou. Pa años kaba FNV ta atvertí pa e efekto aki. I e temporada ainda mester kuminsá. Dos aña pasá tabatin multitut di hende na Schiphol te pafó dje edifisio, debí na skarsedat di vigilante i personal di ekipahe. Míles di pasahero a pèrdè nan vuelo. Aktualmente, ainda por atende e kantidat di pasaheronan pero si bira mas druk, lo tin retrasonan atrobe. Ya tin burakunan den e skema ku ta purba resolve. Di otro manera, ta bini retrasonan. E echo ku salarionan a subi ku 19% no ta hasi masha diferensia pasobra hopi kos a bira mas karu. Schiphol ta splika den un reakshon ku e kondishonnan laboral i preshon di trabou di personal tin atenshon. Nan ta apresia ku sindikato ta supervise, segun un bosero. Nos ta kontinuamente den kombersashon ku sindikatonan i tur kompania ku ta aktivo na Schiphol, inkluso kompanianan di seguridat, pa sigui mehora e kalidat di trabou na Schiphol.