Back to Top
Vigilante banner image

Personanan kompletamente bakuná por biaha pa St. Maarten sin tèst


October 21, 2021 • 2 minüt pa lesa

Minister di Salú Públiko, Desaroyo Sosial i Labor di St. Maarten, Omar Ottley, a informá dikon St. Maarten a skohe pa laga personanan kompletamente bakuná drenta e pais sin mester tèst pa Covid-19.

PUNDA- Entrante promé di novèmber personanan kompletamente bakuná no mester hasi tèst promé ku biaha pa St. Maarten.

Durante rueda di prensa minister di Salú Públiko, Desaroyo Sosial i Labor di St. Maarten, Omar Ottley, a anunsiá ku entrante 1 di novèmber 2021, no ta rekerí pa personanan kompletamente bakuna hasi un tèst di Covid-19 pa por drenta e pais.

Sinembargo, esaki ta konta solamente pa pasaheronan kompletamente bakuná ku bakunanan ku a keda aprobá pa RIVM i Organisashon Mundial di Salú (WHO). Segun Ottley, ya pa algun tempu kaba ta hasiendo investigashonnan nesesario pa por implementá e maneho aki. E lista di bakunanan aprobá ta e bakunanan di Moderna, Pfizer, Janssen (Johnson & Johnson), AstraZeneca, Sinopharm i Sinovac.

Datos sientífiko publiká pa Sentro di Kòntròl i Prevenshon di Enfermedat na Estados Unidos (CDC)a demostrá ku e kantidat di vírus ku un persona kompletamente bakuná ta karga despues di a keda infektá ku Covid-19, ta baha muchu mas rápido kompará ku e kantidat di vírus den un persona infektá ku no ta bakuná. Esaki ta nifiká ku maske ku personanan kompletamente bakuná por keda infektá pa Covid-19, e chèns pa nan plama e vírus òf bira severamente malu dor di infekshon ta sumamente abou.

Na St. Maarten e tasa di mortalidat registrá ta 1.6% di kual 0.4% ta enserá personanan ku tabata kompletamente bakuná. Un porsentahe similar a keda raportá pa hospitalisashonnan bou di personanan kompletamente bakuná. Segun Ottley, esaki ta prueba efektividat di e bakuna i pa e motibu aki por laga personanan kompletamente bakuná drenta e pais sin mester hasi tèst.

Tambe Ottley, a duna di konosé ku trámitenan pa implementá sertifikado digital di Covid-19 (DCC) pa personanan ku a rekuperá di infekshon ta kanando. Esaki ta nifiká ku pronto personanan ku tabata infektá por mustra ku nan a desaroyá inmunidat natural despues di infekshon komo prueba.

Login