Willemstad—– E tim ku ta hasi investigashon di vehíkulonan ku ser hòrta mester a bai Shut pa un pikòp ku un dia anterior a ser hòrta.

Tabata djaweps den oranan di mèrdia ku polis a haña e informashon ku un doño di un pikòp kolo blanku di e marka Volkswagen Amarok mester a yega para su vehíkulo na un sitio i a laga esaki di start pa bai hasi algun diligensia. Durante di su ousensia un tipo deskonosí mester a drenta den e vehíkulo i a bai ku esaki. Ayera den oranan di mèrdia Polis a haña e informashon ku e pikòp ku a ser hòrta mester ta para bandoná kantu di e kaminda di tera ku ta kondusí pa Shut. Polis ku a bai na e sitio enbèrdat a bin topa ku e vehíkulo i mesora a pidi asistensia di  reshèrshinan ku ta hasi investigashon den kaso di vehíkulonan hòrta pa asina yega na e sitio pa hasi e demas investigashon. Tambe a tuma kontakto ku e doño ya pa e ta nan altura ku a haña su vehíkulo. E kaso ta den investigashon.