Back to Top
Responsive image
E korant di pueblo

PIN ta urgí gobièrnu pa transparensia


September 25, 2021 • 2 minüt pa lesa

Willemstad——Segun PIN 24 di sèptèmber 2021 a bira konosí ku Konseho di Minister di Reino a disidí di wanta e sosten di likides pa Kòrsou, supuestamente paso e konseho di Cft ta negativo i e data for di Kòrsou a yega lat.

Transparensia

Tantu aki komo na Hulanda nos ta nota ku polítikonan ta purba pone e problema aki den sapatu di otro òf bent’é riba Cft. Pa nos komo pueblo por ta sigur ku polítikonan no ta tuma nos kabes abou a disidí den kuadro di e lei riba areglo di supervishon finansiero ku tur konseho di Cft mester keda publiká i poné riba nan website.

Intransparensia di konseho i desishon

Den kaso di sosten di likides, Konseho di Minister di Reino a disidí di pidi konseho di Cft  riba e nesesidat di sosten di likides pa e paisnan.  Esaki no ta un tarea basá riba e lei riba supervishon finansiero di Reino ku sí ta preskribí publikashon di e konsehonan di Cft. Nos no a nota tampoko, ku Konseho di Minister di Reino a regla publikashon di e konsehonan den kuadro di sosten di likides dor di Cft pa un i tur por tuma nota di dje.

Pues konsekuentemente tin un falta grandi di transparensia di e proseso pa yega na e tomo di desishon di Konseho di Minister di Reino riba petishonnan di e paisnan pa sosten di likides. Ta trata aki di sumanan kuantioso ku segun sifranan publiká ta papia di mas ku 1 miar florin ku e paisnan i nan suidadanonan lo mester bai paga bèk, amenos si Reino su konsenshi papia i esakinan keda konbertí den ayudo i sosten, manera Statüt ta preskribí den artíkulo 36.

Pues di un forma skondí ta tuma desishonnan importante pa Kòrsou, sin ku nos na Kòrsou por verifiká kiko ta e argumentunan i splikashon  i tambe e rekomendashonnan.

Kiko por tin den e konseho di Cft.

PIN a base di eksperensia den gobernashon ta floho pa kere ku sin mas Cft òf kualke otro órgano di konseho ta duna un konseho negativo. I sigur kaminda den e órgano di Cft tin tambe yunan di tera di tur e paisnan den Reino den Karibe. Por lo general konsehonan ta laga espasio pa e mandatario por sigui negoshá pa yega na otro i pues den e kaso aki pa duna maske ta un parti di e likides nesesario i hopi biaha tambe ta mustra kaminda tin nesesidat pa supstansia e petishon òf bin ku prueba òf laga. E parti aki ta importante pa nos komo pueblo por komprondé kon i pakiko sierto desishon ta keda tumá i supstanshá. Pues transparensia komo parti di bon gobernashon.

PIN ta urgí gobièrnu di Kòrsou pa den kuadro di e lei di ‘Landsverordening Openbaarheid van Bestuur‘ (lei LOB) para ariba ku e konsehonan aki ta keda publiká meskos ku tur otro konseho; of apliká segun nos lei LOB e transparensha nesesario.

Login