WILLEMSTAD: Riba dia 1 di yüni último Pizza Hut a selebrá su 40 aniversario. Tabata na 1983 ku e frankisia di Pizza Hut a establesé su mes habriendo su promé restorant aki na Kòrsou.

E promé restorant di Pizza Hut a habri na Saliña i te dia di awe ta na e mesun sitio. Despues a bini aserka Pizza Hut na Sta. Maria. Atraves di añanan tabatin dos restorant di Pizza Hut den área di Punda. Ora esakinan a sera, a habri Pizza Hut na Brionplein i e último na Brievengat. Di akuerdo ku Surella Veeris di Hucor Holding, “Ta selebrá 40 aña di Pizza Hut dunando servisio na tur kliente ku hopi smak, amor i dedikashon. Durante 40 aña koleganan a dediká ku alma i kurason pa duna e mihó servisio, for di ora Pizza Hut habri 11’or di mainta te ku 10’or di anochi ora sera”.

Lo selebrá durante henter luna di yüni:

Durante henter luna di yüni 2023, lo selebrá e 40 añanan di Pizza Hut na Kòrsou di un forma tur afó ku tur kliente. Lo tin diferente promoshon i tambe lo hasi donashon na 3 instansia lokal. Durante e 40 añanan ku a pasa, tabatin hopi inovashon, no únikamente e smaknan nobo di pizza, pero tambe otro produktonan ku a keda añadí na e menú, manera: Melts, Detroit Pizza, Shoarma Pizza i tambe Meat Balls Pizza. Un variedat amplio pa satisfasé smak di tur hende, tur edat i tur pòtmòni. Pizza Hut Saliña i Sta. Maria, a bira realmente un restorant pa henter famia. Ta masha hopi famia a yega di organisá fiesta pa nan yunan den e ‘private room’. Tambe, kompanianan tabata organisá tur tipo di selebrashon pa nan trahadónan ku ta bin kome den e restorant i pasa ratunan ameno ku nan ser kerí. 

Surella Veeris ta finalisá bisando, “Ku nos 40 aña di eksperensia, nos lo sigui hasi nos máksimo esfuerso pa keda brinda nos klientenan, e mihó pizza i otro produktonan di Pizza Hut, semper kompañá ku e mihó servisio. Alabes ta e meta pa trese mas variashon den sabor i mantené e kalidat ku nos klientenan ta kustumbrá kuné di Pizza Hut. Nos ta gradisí pueblo di Kòrsou, pa kumpra, kome i skohe pa bin serka nos na Pizza Hut. Nos ta inmensamente agradesido pa esei. Pabien!”.