E akusado a keda detené riba 7 di yüni 2023.

Ascencion,– Riba 30 di òktober wardakosta a risibí notifikashon riba radar ku un boto sospechoso tabata move den área di Boka Ascencion den oranan di mainta trempan. Mesora outoridatnan a bai na e sitio pa demas investigashon.

Na momentu ku wardakosta a mèldu pa KPC manda un patruya na Boka Ascencion, mesora outoridatnan a bai na e sitio. Unabes na e sitio, polisnan a nota di un vèn blanku stashoná banda di awa, kual por ilustrá ku e boto ta pendiente pa risibí un lote di droga ku tei drenta e boka. Dado momentu polisnan ta tende na spaño ku “einan tabata tin un outo ku a kaba di paga su lusnan”, kual ta duna e ilustrashon ku e boto tabata sali kaba for di e boka i pa wak unda otro por baha e droga.

40 minüt despues, riba 6.33 di mainta wardakosta ta bolbe risisbí un notifikashon ku e boto a move na Playa Boka Grandi, kual ta den área di Christoffelpark. Alabes ta akinan e hòmbernan lo a baha e lote di droga for di boto.

10.20 or di mainta notifikashon ta bolbe drenta ku dos hòmber ta hinkando sakunan grandi den un SUV i den un Kia Picanto pretu na Playa Boka Grandi. Na momentu ku outoridatnan a interseptá e droga a resultá ku ta trata di 612 paki di kokaina kual a suma 670 kilo. Tambe tabata tin 57 paki di mariwana, kual a suma 43 kilo di e droga.

Ministerio Públiko ta akusá e hòmber Willfreddy Rodriguez Isea di ta kómplise den e kaso aki. Segun e investigashon di OM, Rodriguez Isea lo a tene un bista riba e entrada di Boka Ascencion den oranan di mardugá promé ku e boto a drenta e Boka. Mas aleu, Rodriguez Isea lo a ordená pa lòk e porta pa drenta Boka Ascencion, ya otro deskonosínan no por drenta.

Abogado mr Gomes, kende a hiba defensa pa Willfreddy Rodriguez Isea, a splika ku su kliente ta un hóben di 26 aña ku a bin Kòrsou pa un mihó bida. E abogado a splika ampliamente pakiko mester deklará su kliente liber riba e akusashon di lo a partisipá na importashon di e droga via di Boka Playa Grandi. Mas aleu, a resultá ku Willfreddy Rodriguez Isea lo tabata den posishon di un arma di kandela na momentu ku outoridatnan a tene un entrada hudisial. Akinan Gomes a indiká ku pa porfabor tene kuenta ku e situashon personal di e akusado debí ku semper su kliente a traha bon ku outoridatnan den e kaso aki.

E kaso lo kontinua awe  den korte  unda abogado i tambe Fiskal lo reakshoná.