KONTENTU– Bernice Pop ta un funshonario na Servisio di Salubridat Públiko i ta trahando 3 aña den e Departamentu di Salú Hubenil. Durante un Podcast den e seri presentá pa Hustisia Seguridat i Abo, anfitrion Razia Martis a papia ku Pop riba bienestar di nos muchanan durante periodo di Karnaval.

E departamentu ta kuminsá ku su tareanan for di na momento e beibinan nase. Despues di sinku dia e beibi resien mester bini na e Departamentu di Salu Hubenil pa e hasi tèst di oido. Esei ta un prueba pa analisá si e muchanan di e kapasidat normal di oido. Di einan e mayornan ta kompania e beibi pa e Ofisina di Konsulta pa hasi demas pruebanan. E beibi ta sigui ba e Ofisina di Konsulta miéntras e ta entre 0 pa 4 aña. Na e Ofisina di Konsulta ta vigilá durante un periodo desaroyo di e mucha. Un tarea importante tambe ta pa kordiná e proseso di bakuna pa por protehá nos pueblo. Segun Pop a splika durante e prodcast ku e proseso di bakunashon no ta unu obligatorio, esta no por obligá e mayor di laga bakuna su yu.

Den e kaso ku un mayor ninga, e Departamentu di Salú hubenil ta duna splikashon dikon ta importante pa e yu pasa den e proseso di bakunashon. Tambe ta duna informashon dikon mester hasi diferente prueba ku e beibi, prinsipalmente e parti di oido. Ta importante pa realisá si un yu no por skucha, e no por papia tampoko. Pa tal motibu ta importante pa detektá e problemanan for di tempran. Na dado kaso si e tèst di oido por ehèmpel no sali bon ta sigui hasi mas prueba ku e mucha. Si einan tambe tin resultadonan negativo, e departamentu ta skibi karta pa e spesialista KNO pa sigui ku guia i tratamentu. I finalmente si mester e yu ta risibi aparato for di tempran pa yud’é skucha.  Despues di 4 aña, ta gradisí e Ofisina di Konsulta pa su tareanan ehekutá pa ku e yu. Di einan e mucha ta kuminsá su trayekto di skol. Na e skol e trayekto di bakunashon ta sigui normal. Einan tambe tin médikonan i enfermera ku ta bishita skol pa kontrolá e muchanan.

Durante karnaval semper ta surgi e diskushon riba e tema di oido pa menornan di edat. Riba esaki tambe Raiza Martis i Dikmar Oleana a delibera ku sra.  Bernice Pop. For di Novèmber na Ofisina di Konsulta ta duna informashon, debí ku no ta pa Karnaval so tin e prekupashon sino mester protehá e oido pa eternidat. Segun Pop ta konsehando mayornan pa mucha ménos di 4 aña pa no bai wak Marchanan di Karnaval òf aktividatnan karnavalesko unda tin zonido haltu. Un mucha di 4 aña ainda no ta konsiente kiko ta pasando. Si  e mayornan opta pa bai ku e yu menor di 4 aña tòg, ta konsehabel pa bai ku ekipo adekuá pa tapa orea di e yu. Pa muchanan di 4 aña bai ariba ta konsehabel pa pone dòpi di orea ku filter i asina protehá nan oido.