Polisnan buskando esun ku tabata manehá e vehíkulo ku Shairon komo okupante.

Willemstad—- Ayera Polis a emití un komunikado na unda ta konfirmá ku e víktima Shairon Paulina lo tabata envolví den e atrako den e minimarket na St Kittsweg unda e la wòrdu alkansá mortalmente pa un bala for di un arma di kandela di un agente polisial ku tabata na sivil.

E komunikado emití pa Polis ta bisa lo siguiente : Kontinuando ku un investigashon den e kaso enkonekshon ku hòmber hañá morto den bario di Kanga den e kaso aki e víktima Shairon Paulina , a  bin sali na kla ku e hòmber tabata enbolbí den e kaso di atrako ku a tuma lugá un dia promé na un minimarket den St. Kittsweg, unda eiden durante di e atrako e atrakadó a bin hañ’é den konfrontashon ku un agente polisial na sivil ku a los tiru dirigí riba e atrakadó ku e konsekuensha fatal.  Departamentu di reshèrshi ta kontinuá ku investigashon den e kaso ariba menshoná. Tin ku sigui bisa ku reshèrshinan di e tim di atrako ta hasiendo e demas investigashon i awor ta buskando e kómplise den e kaso di atrako. Ta trata aki e shofùr ku tabata manehá e getaway car ku a keda na un distansha para warda e víktima Shairon Paulina bai kometé e atrako. Despues ku Shairon a ser tira den e minimarket e lo mester a kore bin pafó unda e shofùr di e outo lo ta esun ku a baha yud’é i asina e gui’é hink’é den e outo i nan a kore bai for di e sitio. E kómplise esta e shofùr di e vehíkulo nunka no a hiba e atrakadó herida pa CMC pa asina e por a haña asistensia pero a trata si pa buska un dòkter pero sin e resultado deseá te na momento ku e atrakadó esta Shairon Paulina a bin fayesé den e vehíkulo. Esaki a pone ku e shofùr mester a baha bai laga e atrakadó atras sin a buska yudansa pe. Awor aki e tim di atrako ta buskando esun ku tabata manehá e vehíkulo aki ya ku e ta kómplise den e kaso di atrako riba e Minimarket den St Kittsweg.  Polis ta disponé di basta informashon ken por ta e posibel shofùr ta ku a baha bai lagando  Shairon herida atras den e vehíkulo. Tin informashon ku e sospechoso shofùr lo mester ta un hòmber ku ta biba den un bario pariba di brùg i ku ya tabata envolví den kasonan di atrako unda einan tambe su kompañero lo a bin pèrdè su bida durante di un atrako. Esaki ta pone ku lo no dura masha pa asina pone man riba dje. E kaso ta den investigashon.